Ramri-a Myanmar nena insumdawn tawnna tluang taka kalpui leh a ni tawh

Myanmar-a Rakhine State leh Chin State chhim lam nena Siaha District Khaikhy hmuna insumdawn tawnna chu khar a nih hnuah kar kalta Ningani atang khan tluang taka chhunzawm leh a ni. Mara thalai pawl, Mara Thyutlia Py (MTP) chuan Siaha District Khaikhy-a Myanmar nena insumdawn tawnna September ni 16, 2026 zan dar 700 atanga an khar chu Myanmar hel pawl nena an inbiak hnuah kar kalta Ningani tlai dar 4:00 atangin an hawng leh tan leh ta a. Myanmar sipai sawrkar dotu United League of Araka (ULA) hruaitu pali te leh MTP hruaitute chu Siaha khawpui-a MTP General Headquarters Conference Hall-ah Ningani zing khan an inbia a. ULA aiawh pahnih - Border Relation Officer Chonai leh County Administrator Nan Zing te chuan September ni 14-a Khaikhy a tharum thawhna thleng chu pawi an tih thu leh inlaichinna tha tak a awm an beisei thu an sawi a. MTP President S. Vabeihasa leh Vice President FC Khihnia te'n thu an sawi bawk a. Hemi hnu tlai lamah hian MTP hruaitute thukhawm chuan insumdawn tawnna khar hi hlih nise tiin thutlukna an siam ta a a ni. Tunah hian Khaikhy, Lomasu leh Lodaw a ramri insumdawn tawnna chu tluang takin a kal leh tawh niin an sawi a ni.