Health Minister-in Luhkapui Portal a tlangzarh
Luhkapui Portal hi Zirtawpni kalta khan Health & Family Welfare Department Minister Lalrinpuii chuan a Pisa-ah tlangzarhin he Portal hi Damdawi lama eizawnna kalpui tur ten License dilna an thehluhna atan te, dan hnuaia endik hnua license pekchhuah lehna tur atan te-a Department leh heti lama mithiam ten an hman atan ruahman a ni a. Mipui vantlang he portal mamawhtute chuan kumin October ni 1 atang hian Portal hi an hmang tan thei tawh dawn a ni.
Health Department leh ICT Department tangkawp buatsaih Luhkapui Portal tlangzarhna hunah hian Health Minister Lalrinpuii chuan India State-te zinga digital-a engkim kalpui nasa ber State nih tuma Mizoram tan lakna nena inmil tak Luhkapui Portal hawn a ni ta chu lawmawm a tih thu a sawi a. Sawrkar laipuiin ramchhunga eizawnna leh sumdawnna hrang hrangte zalen leh langtlang zawka kalpui a nih theih nana dan leh hrai thenkhat thlah dul tura a hriattirna, De-regulation 2.0 hnuaiah ngaih pawimawh bik (Priority area) 19 leh 20-na te thlir chungin Luhkapui Portal chu a hawng a, mamawhtu mipuite nasa takin a chhawk zangkhai ngei a beisei tlat tih a sawi bawk.
Health Minister chuan he Portal hi a taka kalpui a nih hunah chuan dilna lut leh pekchhuah te pawh chak leh langtlang zawka a kal theihna turin SNA-te chu theihtawp chhuah tura chahin, sawrkar inrelbawlna te samkhai zawka kalpui (ease of doing business) chu Sawrkar laipui leh Mizoram sawrkar pawhin a ngaihpawimawh ber pakhat a ni tih a sawi a. Portal chu hlawhtling taka kalpui a nih theihna turin Department hrang hrangte thawhona pawh a tul hle dawn tih a sawi bawk.