Electric Bill kan ti pung lo ang kan tih angin kan ti pung lo - P&E Minister

Power & Electricity Department changtu Minister F. Rodingliana chuan, “ZPM sawrkar chuan Electric Bill kan ti pung lo ang kan tih angin kan ti pung lo a ni,” a ti.

Nimin-a ZPM Party in Aizawl-a an Office-a Chhung Inkhawm an neih ah P&E Minister F. Rodingliana chuan P&E Department hmalakna sawiin, Power-a kan indodelh nan theihtawpa hmalak mek a nih thu sawiin, “ZPM sawrkar chuan Electric Bill kan ti pung lo ang kan tih angin kan ti pung lo a ni,” a ti a. “Financial Year 2018-19 atanga Financial Year 2022-23 chhunga Domestic Category-a Power hralhna rate pun dan average chu Unit khatah Rs. 0.40 a ni a. Hemi pun dan rate hian Financial Year 2023-24 atanga Financial Year 2025-26 chhunga Domestic Category-a Power hralhna average rate chu kum 2023-24 ah Rs. 6.31; kum 2024-25 ah Rs. 6.71; kum 2025-26 ah Rs. 7.11 leh kum 2026-27 ah Rs. 7.51 a ni,” a ti a. “Tunah hian Aizawl khawpuiah Consumer 1,30,000 vel kan awm a, Meter Reader hi mi 150 chauh an awm a ni. Chu vangin, Smart Meter hian kan harsatna a tih ziaawm kan beisei a, theihtawp kan chhuah mek zel a ni,” a ti.

P&E Minister chuan tunhnaiah Smart Meter chungchangah sawi neuh neuh a tam avangin Complaint Runpui hawn a nih thu sawiin, “Chuta complaint dawn zawng zawng chu 1340 niin, 1067 chinfel nghal a ni a, la chinfel loh 273 a awm a. A hmuna an Connection leh Meter en ngai 133 awmin, Check meter vuah tur 140 a awm a, chung zinga 125 chu vuah a ni tawh a, Call theih loh leh an awm loh vanga la vuah loh 15 an awm a. Check Meter leh Smart Meter inmil 102 niin, Smart Meter kal chak bik hi 9 a awm a, kal muang 14 a awm bawk. Check Meter nena compare a Smart Meter chak leh muangte hi Testing Bench-ah test leh tur an ni ang,” a ti bawk.