Bana Kaih Scheme kaltlangin an ti hlawhtling tih sawi
Zirtawpni kalta khan Aizawl-a Irrigation & Water Resources Conference Hall-ah Chief Minister Lalduhoma hian Bana Kaih thawh thumna, ‘Handholding 3.0’ chu tlangzarhin he hunah hin Chief Minister chuan kum tam tak an lo tlangau pui thin thlai thar leina budget-a dah te, Loan pung awm lo (100% interest subvention) leh Bank Guarantor-a sawrkar a tan theih thute chu Bana Kaih Scheme kaltlang hian an tihlawhtling chho zel tih sawiin, “Kalphung Thar chhinchhiah tlak, ram tana tangkai bawk si a ni,” a ti a. Bana Kaih a hlawhtlin theih nana mawhphurtute zawng zawng chungah lawmthu a sawi a ni.
Chief Minister chuan ‘Bana kaih’ hian a huam zau tih sawiin, sawrkar Development Scheme zawng zawng deuhthaw a huam thu a sawi a. “Mi nawlpuiin kan hriat lar, Thlai thar lei, Loan Component leh CM Package bakah Infrastructure din nan Project engemaw zat kan kalpui bawk a. Turmeric Processing Industry at Industrial Growth Centre, Luangmual; Ginger Processing Unit at Horti Centre, Sairang; CMs Innovation Challenge; Mizoram Handholding Venture Capital Fund; Procurement of Solar Dryer & Slicing Machine; Wheat & Maize Contract Farming leh Construction of Drying Shed and Hay Making at AH&Vety Farm at Thenzawl te chu a langsar zual an nih thu a sawi bawk.
Chief Minister chuan Partner Banks-te nena an thawhhona a that thu leh Progress partner ten loan an rulh that thute an hriat thu sawiin, “Bana kaih hmangin Moral Reformation a thleng mek a ni,” a ti a, “Kan thalai, ram pawna hna zawng mekte tan Bank loan lak tur a awm loh avangin mi tam tak ten harsatna an tawk tih kan hria a. Foreign Placement Loan hi Handholding kaltlanga inpek dan kan ngaihtuah mek a. Hei hian thalai engemaw zat employment a siamsak theih kan beisei,” a ti a, vanduaina avang liau liaua kan progress partner hlawhchhamte tan a thawh thumnaah hian Rehabilitation Scheme siam an tum thu a sawi bawk.
Monitoring uar zawka kalpui an tum thu pawh Chief Minister chuan sawiin, “Mizoram-a project tam ber hlawhchhamna chhan chu vil zui a nih thin loh vang a ni. Chuvangin, kan Progress Partner zawng zawngte khan - Implementing Department leh Bank-te pawhin an rawn enzui dawn che u tih lo hria ula, dik tak leh rinawm takin pawisa lo hmang ang che u,” tiin Handholding scheme hi Vishit Barat 2047 tinzawn rana kalpui an nih thu a sawi bawk a ni.