Serchhip Leivung paihna atan hmun pahnih pawm a ni
Serchhip-a leivung paihna hmun, Serchhip By-pass road Lei (bridge) bul ami chu environment tan a him lo tih hriat a nih avangin a thlakna tur hmundang zawn a ni a, hemi atana Survey Team te chuan August 11, 2026 khan Surver neiin hmun pathum chu an enfiah a, heng te hi nimin khan Serchhip District Bawrhsap Paul L. Khuma hovin thlirho a ni a. Serchhip khawchhunga leivung paihna tura Survey Team ten an lo thlan (recommend) tawh hmun pathumte zinga pahnih, Khawtetlang thlang By-pass road, New Serchhip North VC area (Kikawn atanga km 3.3 leh K. Hrangnawna ram, Serchhip Chhim Veng VC area By-pass road ami (Sailiam-kawn atanga km 2.3) te chu Notify tur atan an pawm a ni.
Survey Team ten an lo thlan tawh zinga pakhat, Keitum dai ami erawh chu Zawlpui leilet leh huan neitu inzawmkhawm pawl, FMC te rawtna angin Serchhip Zawlpui tan a hlauhawm thei nia hriat a nih avangin Spoil Bank atan hian hman ve loh ni se tiin Committee chuan a rel a. Football Field atana siam tumna hmalakna kal mekah dawl zawlna tura leivung mamawh a nih chuan retaining wall siam zawh a nih hunah dawl zawl nan leivungte paih chauh nise tia rel a ni bawk.
Nimin-a thutkhawm ah hian sawrkar hotute bakah khawtlang hruaitute, YMA leh concerned VC hruaitute, FMC hotute leh kawnglaitu NHIDCL leh Contractor te an tel a, Serchhip District Bawrhsap Paul L. Khuma chuan Serchhip mipuite tan leh chhuan thar lo awm zel turte tan Spoil Bank mumal tak, hmun engemaw zatah neih a pawimawh thu sawiin, hmun remchang tha zawk hriat a nih chuan thuneitute hnena hriattir zel turin khawtlang hruaitute chu a sawm a ni.