MNF Thalai ten Chief Minister zin haw an hmuak

MNF Thalaite chuan Chief Minister in Mizoram remna thuthlung ziah leh ILP chungchang a sawidan duh lohna lantirin Inrinni khan Chief Minister zin haw chu Pawndum leh puanzar dum kengin CM Bangla kawt-ah an lo hmuak.

He hunah hian MNYF President Gogo Lalremtluanga chuan Zoram mipuite'n duhsak taka Chief Minister dinhmuna an dah Lalduhoma chu Mizo mipuite harsatna hre êm êm tawh tur a nih laia Peace Accord chungchângah te, ILP chungchâng ah te thalaite rilru hruai khawlo zawng leh mipui tithlabâr zawnga thu a la sawi duh chu a pawi a tih takzet thu sawiin, “Enchhin sawrkar hnuaiah ei leh bar man sang chho tial tial a, chhiah nasa takin an khawn a, Zirtirtute leh zirlai ten harsatna hrang hrang an tawk mek bawk a, tunah hian Mizo thalai te hian kal ngaihna an hre tawh lo a ni,” a ti a. Article 371 G leh ILP chu dan hran ve ve ni mah se thil kalkawp tlat nia sawiin, “Article 371 G-a ram leh hnam venhimna tur atana khawl tha ber chu ILP a ni a, hetiang a nih lai Chief Minister-in Mizoram remna thuthlung ziah leh ILP a sawi bawrhbang ta mai chu Mizoram tan Security risk lian ber a ni thei,” a ti bawk.

Chief Minister hi kar kalta khan New Delhi-ah zinin Inrinni khan Aizawl a rawn thleng a, Aizawl a rawn thlen hnu hian Lengpui Airport atangin Assembly House-ah programme hmanpui turin tlang nghal a, Pawndum nena Chief Minister lo hmuaktu MNF Thalaite chuan anmahni hmuh ngam loh avang programme siam chawp ah puhin, MNF Thalai hruaitute chuan Chief Minister hnena lehkha pawimawh- Chief Minister in a thusawi sut tur leh Mizoram mipuite hnenah tun thla ni 15 ralhma ngei ngaihdam dil tura an phutna lehkha chu Chief Minister Pisa-a a Office kawngkhar-ah an tar nghal bawk a ni.

Hetihlai hian Ex-Mizo National Army Association (Ex-MNA) leh Peace Accord MNF Returness Association (PAMRA) te chuan Inrinni khan Aizawl Press Club-ah thuthar thehdarhtute kawmin ‘nunna tam tak leh thisena an hlawh chhuah Remna Thuthlung sawi dal an phal lo’ tih an sawi a. Coordination Committee on Ex-MNA & PAMRA chuan Mizoram in remna thuthlung a neih, a rah an seng mek chu nunna tam tak leh thisena an hlawh chhuah a nih thu sawiin, Chief Minister Lalduhoma'n sawi nep leh sawi dal a tum chu thinrimthlak an tih thu leh remna thuthlung hmang thiam lo leh hmang ngam lo a nih chuan thuneihna a chan mek chu midang kutah hlan se tih chu hnam sipaiten an duhdan a ni tih an sawi a. Remna Thuthlung hmanga nemngheh 'Inner Line Regulation' chungchang ah pawn lam atanga nawrna pawh awm si lova kan ram leh hnam inhumhimna kulh pawimawh tak 'Central sawrkarin a duh chuan min thiahsak thei' tia a sawi chu vanduaithlak an tih thu an sawi bawk.