Zoram mipuite tan Sumdawnna kawng tiawlsam turin hmalak a nih thu Chief Minister in a sawi
Chief Minister Lalduhoma hian nimin khan CM Conference Hall-a thuthar thehdarhtute kawmin Mizoram Sawrkarin sumdawnna kawng hrang hrang tih awlsamna tura hmalakna 'Compliance Reduction & Deregulation Reforms Programme' a kalpui mêk chungchang a hrilhfiah a. Chief Minister chuan he hmalakna hi Mizoram economy thang chho zêl tûr leh mipuite tâna hna siambelhna kawnga lungthu pawimawh tak a nih tur thu sawiin, Mizoram Sawrkar chuan India Sawrkar laipui hmalakna zinga pakhat, Compliance Reduction and Deregulation Reforms Programme hnuaia dân leh hrai tûl lo leh rit lutukte tihtlêm a, kalphung tihawlsam te, inrintawnna thupuia hmang chunga rorelna kalpui te leh sumdawnna lama hmasawnna leh investment, entrepreneurship leh economic growth tana environment tha siam tumna chu nasa takin a kalpui mêk tih a sawi a. Commerce, Industries, Geology & Mining Department chu Nodal Department niin, anni hian Mizoram sawrkar hnuaia Department leh Agency hrang hrangte he hmalaknain a huamte enzuiin an kaihruai tih a sawi a ni.
Deregulation Phase-I (February–December 2025) hnuaiah hian State sawrkar chuan dân leh hrai zawm ngai tihawlsam te, sumdawnna kawng hrang hranga phalna lak dân tihmumal te, digital governance tihchak te leh mipui hnena rawngbawlna tihhmasawnte ngaihpawimawh hmasak ah neiin siamthatna hrang hrang a kalpui tih Chief Minister chuan sawiin, “Hêng thawhrimna te avâng hian Department for Promotion of Industry and Internal Trade (DPIIT)-in ram pum huapa endikna a neihah Mizoram chu India ram State-te zingah 12-na a ni,” a ti a. Phase-I chhunga hmasawnna pawimawh kalpui te chu ram hman phalna (land-use approvals) tihchangtlun (digitization), India Industrial Land Bank nena thlunzawm GIS hmanga Industry ram mapping siam te, In sak dân inkaihhruaina thlahdul te, hnathawktute dân (labour law) siamthatna te, MSME-te tana hmunhma leh chhehvel phalna (environmental clearances) lak dân tihawlsamna te, nitin mamawh hrang hrang (utility services) online-a pekchhuahna te, Jan Vishwas ang chi siamthatna te leh State service-te National Single Window System (NSWS) nena thlunzawmna te an nih thu a sawi a. Hêng hmalaknate hian thil kalpui dân tlang leh felfai zâwk, rang zâwk leh sumdawnna atana remchang zâwk dinhmun siam nan nasa takin min pui dâwn thu a sawi a ni.
Heng hlawhtlinnate bawhzui hian sawrkar laipui chuan January 2026 khan Deregulation Reforms Phase-II a tlangzarh leh tih pawh Chief Minister chuan sawiin, Phase-II ah hi chuan State-a dân leh hrai hman mêkte uluk taka thlirletna leh tihhmasawnna lam chu thupui ber a nih thu leh he Phase hnuaia ngaihpawimawh bîk (Priority Areas) 23 Mizoram tana thlanchhuah zinga hmalakna panga te chu India sawrkarin a pawm tawh thu bakah Priority Areas hmabak dang te pawh tilawhtling tûrin chak taka kalpui mêk a nih thu a sawi bawk.
Hêng hmalakna hrang hrangte hian State chhunga sumdawnna din leh kalpui nana senso leh hun hman thin nasa takin a tihniam dâwn mai bakah kalphung harsa leh hnawk te a tiziaawm dâwn tih Chief Minister chuan sawiin, Deregulation hnuaia hmalakna dân siamthatna (reform) kawnga Department hrang hrang hotute, Officer-te leh he hnaa inhnamhnawih zawng zawngte thawh-rimna chu a fak a. Mizoram chu Phase-I aia dinhmun sâng zâwk a inhlangkai thei ngei tûra tan la tûra chahin, hmalakna tur la awm te huntiam chhunga zo ngei turin a fuih bawk a ni.