Vawk vulhtu Society ten Assembly an hmang
Serchhip-a Vawk vulhtu intelkhawm, Serchhip Town Piggery Cooperative Society Assembly hi Serchhip P&E Veng-a an Ranchaw herna In-ah neih niin an Society Chairman K. Remlalliana chuan a kaihruai a, he hun hmanpuitu District Cooperative Officer (DCO) Lalhruaitluanga chuan Mizoram-a Tribal te chu India ram State danga Tribal aiin an changkang zawk chungin anni ho nen inang rengin hamthatna kan dawng thu a sawi a. ASF vangin Vawk vulhtu tlem tial tial mah se theihtawpa tan la chho a, ranvulh lama tan la zel turin a fuih bawk.
Serchhip DCO chuan Pradhan Mantri Janjatiya Vikas Mission (PMJVM) chungchang sawifiahin, “He Mission hian Tribal te thil dehchhuah te man man taka hralhchhuah dan kawng zawn a, sumdawnna mumal tak kalpui theih dan ngaihtuah a ni,” tiin tunah pawh hian Serchhip-a Vawkvulh Society te chu Kawlri Van Dhan Vikash Kendra Self Help Group dina chumi hmanga hamthatna leh hlawkna tur dap a nih thu a sawi bawk a. He hunah hian Society Member mi 62 te hnenah Vawk chaw chhumna tur Bel, Dekchi ft. hnih (2) hawlh-tlang sem a ni a, pakhat hi Rs. 4900/- man niin tangkai taka hmang turin a chah bawk a ni.
Serchhip Town Piggery Cooperative Society Assembly-ah hian Asst. Secretary, PC. Lalromawia chuan Report pein an Society hi kum 2010 khan din a ni a, tunah hian Member mi 62 awm mekin Assembly-ah hian mi 58 an tel a. An Society hian PMJVM hnuaiah ranchaw herna khawl neiin hralhchhuah theih turin ranchaw hi an her mek a, hemi atan hian Bialtu MLA hnen atangin MLA Fund cheng nuai 5 an hmu tawh bawk. He Assembly-ah hian ranchaw quality tha zawka her thei tura hmalak an rel bawk a ni.