BSF 2 thiamloh chantir an ni

Aizawl Judicial District-a Additional & Sessions Judge chuan BSF mi pahnih-te chu hmeichhe pawngsual rawn leh Acid hmanga theh thubuai ah thiamloh a chantir a, naktuk-ah hremna puan a ni ang.

Additional & Sessions Judge-I Sylvie Z. Ralte chuan BSF mi 2- Nilanjan Das leh Dinesh Kumar te chu hmeichhia pawngsual rawn a acid a theh zui thubuai ah Zirtawpni khan thiamloh a chantir a. Prosecution lam sawi danin kum 2017 July ni 18 khan Marpara Police Station-ah thubuai ziahluh niin BSF mi pahnih hian Mamit District a Silsury West BSF Post-a an awm laiin July ni 16, 2027 khan Chakai khawrh leh ramhnuai a chawhmeh zawnga kal hmeichhe pahnih zinga pakhat chu a thiannu zun zunga a kal hlanin an pawngsual rawn a, a hmai-ah Acid-in an theh bawk a. A hmai vel hi a kang nasa hle a. He thil thleng hi chhui chian a nih hnu-ah Marpara Police Station-ah hian IPC section 326A, 376D, 376(2) (m) leh 34 hmangin thubuai ziahluh a ni.

A thiannu pawh hi an zawn hnuah a tukah a bul lawkah a ruang hmuh a ni a, tualthi ngei ni a hriat a ni a. Pawngsual tawktu hi endik a nih bakah a thawmhnawte endik a ni a, nunna chan ta thawmhnaw pawh hi Forensic Science Laboratory-ah endik a ni ve bawk a ni.

He pawikhawihna chhuitu Police Officer te chuan 181 Batallion BSF Camp tlawhin Duty tur ruatna an en hnuah heng BSP sipai pahnih te chu hemi ni-a eitur petu/semtu an ni tih hriat-chhuah a ni a. Court hmaah hian thuhretu Doctor leh FSL tiamin mi 18 kawm an ni a. Heng puhna hrang hrang atang hian BSF mi pahnih te hi thiamloh chantir an ni ta a ni.