Health Minister in ONDLS leh FIRMS tlangzarhin 'Most Digitized State' ni tura hmalak a nih thu a sawi

Health & Family Welfare Department hnuaia Drug License, Cosmetic License leh Medical Device Registration chi hrang hrang pekchhuahna tur, National Digital Platform-Online National Drug Licensing System (ONDLS) leh FDA Integrated Reporting & Monitoring System (FIRMS) chu Mizoram-a hman theih turin Zirtawpni khan Health Minister Lalrinpuii chuan a tlangzarh.

Health Minister Pisa-a heng Portal thar tlangzarhna hunah hian Health Minister chuan he Portal thar hian 'Ease of Doing Business' kawngah min pui a beisei thu sawiin, Mizoram chu ram pumah 'Most Digitized State' ni tura Chief Minister-in hma a lak nasat thu tarlangin, Health Department pawhin online-in hna a kalpui nasa a; chung zingah chuan, MUHCS hnuaia online registration kalpui mek pawh a tel thu a sawi bawk a ni.

ONDLS hi Government of India, Ministry of Health & Family Welfare-in Digital India Vision tihhlawhtlinna tura a kalpui mek a ni a, Central Drugs Standard Control Organization (CDSCO) leh Centre for Development of Advanced Computing (CDAC) te tangkawpin Central leh State/Union Territory Drug Control Authority zawng zawngte hman tura buatsaih a ni. Damdawi, Cosmetics leh Medical Device-te hi Drugs & Cosmetics Act, 1940 leh Rules, 1945 hnuaia licence nei thlapa siam emaw, zawrh emaw theih an ni; technology hmasawn zel karah India ram puma damdawi licence pekna leh enkawlna chu system pakhat hnuaia felfai leh inang tlang taka kalpui a nih theih nan ONDLS hi duanchhuah a ni.

ONDLS hi CDSCO, Ministry of HFW chuan State tinte hmang tura tiin, State thenkhat Online system dang hmangte pawh ONDLS-a inchhung khawm turin a ti bawk. Mizoram FDA pawhin ONDLS hman tumin Health Department-in sawrkar leh mipuite tana a thatna leh hlawk zawkna tur kawng hrang hrang a zirchian hnuah ONDLS chu Mizorama hman theih turin May 22, 2026 khan Notification a chhuah a. ONDLS hnuaia kalpui turte chu Drugs Manufacturing License, Cosmetics Manufacturing License, Retail License, Wholesale License, Blood Centre License, WHO GMP Certificate of Pharmaceutical Product (COPP) te hi an ni. 

FDA Integrated Reporting & Monitoring System (FIRMS)-ah hian thil pahnih a awm a, pakhat chu FDA Officer-ten Monthly Report an pekna tur a ni a, pakhat dang leh chu damdawi ruih theih khuahkhirh ngai zual lakluh leh hralh vil zuina tur a ni a. Damdawi zingah hian ruih nana hmansual theih tam tak a awm a, chung damdawite chu Doctor chawh chauhva hralh tur (Prescription drugs) an nih laiin, Doctor chawh lohva hralh ral a tam hle a. Heng damdawite hi Mizorama lakluh khap ngawt a rem si loh avangin hmansualna tur ven nan leh vilzui nana tih a ni.