Chief Minister in Union Home Minister a kawm

New Delhi-a zin Chief Minister Lalduhoma chuan Zirtawpni khan Union Home Minister Amit Shah chu a Pisa, Kartavya Bhawan-ah kawmin Mizoram hmasawnna tur thil pawimawh hrang hrang a sawipui.

He inkawmna ah hian Chief Minister Lalduhoma chuan Security Related Expenditure (SRE) Scheme hnuaia hmarchhak Bial ten tanpuina an dawn thinah Mizoram chu hel awmlohna, State ralmuang a nih avangin pek a ni ve lo tih a sawi a. Drugs tawlhrukna leh Cyber Crime dona kawnga sawrkar tha tih chak nan SRE hnuaiah hian sum pe ve turin a ngen a. Union Home Minister chuan hmarchhak Bial hmasawnna tura ruahman bik PM-DeVINE (Prime Minister’s Development Initiative for North Eastern Region) Scheme atanga Project thehlut zawk turin a lo rawn a, a lo bawhzui sak tur thu pawh a hrilh a ni.

Chief Minister chuan Manipur, Bangladesh leh Myanmar atanga raltlan mi 40,000 dawn Mizoram-ah an awm mek thu te, State sawrkarin heng mite chhawmdawlna tur hian theihtawp a chhuah zel thute sawiin, Sawrkar laipui tanpuina kan mamawh hle tih a sawi a. Home Minister chuan raltlante chhawmdawlna atan hian Mizoram sawrkar hnenah cheng vbc.10 man hu buhfai pek a nih tur thu a lo hrilh bawk a ni.