Special Intensive Revision (SIR), 2026 neih tur sawiho

Nimin khan Serchhip-ah District Level Standing Committee on Special Intensive Revision (SIR), 2026 chu Bawrhsap Paul L. Khuma hovin an thukhawm a, Special Intensive Revision (SIR) neih tur chungchang an sawiho a ni.
Serchhip DC Meeting Hall-a he thutkhawm ah hian District Election Officer Paul L. Khuma chuan Electoral Roll dik, rintlak leh felfai a awm theih nana Special Intensive Revision neih mek a nih thu leh ramhnuk khawih thil a nih avangin uluk taka kalpui a pawimawhzia a sawi a. India ram khua leh tui dik takte chauh voter list-ah hian an chuang tur a ni tih sawiin, engkim langtlang taka kalpui tur a nih thu a sawi a. Thawhhona tha tak neih a pawimawh thu sawiin, tlawmngai pawl, political party leh Civil Society-te chu he Revision hna hi tha taka a kal theih nan Election Department thlawp tlat turin a ngen a ni.

He thutkhawm ah hian Serchhip Election Officer Lalchhanhimi chuan Special Intensive Revision, 2026 kalpui dan tur leh inkaih-hruaina te a sawizau a, Serchhip District chhunga inbuatsaihna kalpui mek dante sawiin, thawktu zawng zawngte chu thahnemngai taka thawk tur leh India ram khua leh tui dik takte chu, tumah hmaih an nih lohna tura tan la theuh turin a chah a. Mipuite inzirtirna (awareness drives) leh Voter Outreach activity hrang hrangte pawh District chhung hmun hrang hrangah chak taka kalpui chhun-zawm a nih tur thu a sawi bawk.

He thutkhawm ah hian Political Party hrang hrang, Tlawmngai pawl (NGOs), Media leh Chanchinbumi pawl aiawhte, Election Department hotu - Electoral Registration Officers (EROs), Assistant Electoral Registration Officers (AEROs) leh Officer pawimawh dangte an tel a. Special Intensive Revision (SIR), 2026 neih tura hriat tur pawimawh hrang hrang inhrilhfiah niin zawhna awm hrang hrangte pawh inzawhfiah nghal a ni bawk.