YMA hnenah Motor hlan

Aizawl West-III Bialtu MLA VL. Zaithanzama chuan MLA Area Development Fund atanga a lei Motor (Super Carry) chu nimin khan Mission Vengthlang Branch YMA hnenah a hlan a, he hunah hian Bialtu MLA chuan Motor thar chu a pek a ni lo tih sawiin, “MLA Fund hi mipui sum a ni. West-III Assembly Constituency chhunga mipui mamawh atana hman tur a ni a. Tun tumah pawh hian motor hi ka pe che u a ni lova, MLA ka nih avanga Fund hmanna tur buaipuitu ka nih angin khawtlang mamawh motor hi kan ngaihtuah tlang a ni,” a ti a. A Bial chhung veng hrang hrang mamawh a lo ngaihtuahsak fo thin thu a sawi bawk.