Kawng laih mek chawlhsan a hmunah enfiah a ni

Tlabung khawchhung a National Highway 302 sial hna thawh mi thenkhat dodalna avanga chawlhsan mek chu Inrinni khan Tlabung SDO (Civil) hovin a kaihhnawih Official te leh khawtlang hruaituten an enfiah.

Cheng vbc. 849 senga NH 302 sial zauh leh laih that hna thawh mekah hian hnathawktute chuan Tlabung khawchhung an lai thleng tawh a, chhan engemaw vanga tualchhung mi thenkhat ten hnathawh kallai ni 5 chhung an chawlhsantir chhan chu Inrinni khan Tlabung SDO (C) Moses Lalfakawma Tlau hovin NHIDCL Official leh Contractor bakah NH 302 Ngaihven Pawl, VC leh YMA aiawhten an enho a ni. 

Kawng sial hna tihtawp tirtute chuan Right of Way pawn a chhak lamah awm mah se, kawng laih a nih chuan an awmna chu nasa taka min thei dinhmunah a ding niin an sawi a, kawng enfiahtute chuan an thil hlauhthawn chu hriat-thiampui mah se, tun dinhmunah zangnadawmna pek theih an ni lo tih sawiin, kawng laih avanga dinhmun hlauhawma an ding a nih chuan an harsatna chinfelpui tura theihtawp chhuahpui an intiam thu an sawi a ni.