Chief Secretary in Saitual District a tlawh

Mizoram Chief Secretary Khilli Ram Meena chuan Inrinni khan Saitual District tlawhin Head of Office te a kawm.

Saitual DC Conference Hall-a Head of Office te a kawmna ah hian Chief Secretary Khilli Ram Meena chuan Saitual-a Department hrang hranga Officer kalkhawmte chungah lawmthu sawiin, Saitual District chu a vawikhat tlawhna a nih thu leh hun hlawkthlak tak a hman a beisei thu a sawi a. Saitual District chu ruihhlo kalkawng a nih avangin sawrkar leh khawtlang mipuite chu ruihhlo do kawngah tanrual a tul tih a sawi a, DC leh SP te chu khawtlang leh Kohhran hruaitute nen thawkho a theihtawp chhuah turin a chah a. Saitual District chu Manipur leh Myanmar ram nen a inri avangin raltlante pawh Biometric Registration tih vek tha a tih thu sawi bawk.

Chief Secretary chuan Sawrkar laipui scheme tha tak tak a tam tih sawiin, mi tam takin heng Scheme te hi hmasawn nana an hman a, an lo tangkaipui theih nan Department tin te chuan thawhhona tha an neih a pawimawh thu a sawi bawk a ni.

He thutkhawm hi Saitual Bawrhsap Srinivas Sadi chuan kaihruaiin Saitual District chanchin leh a dinhmun mek te tarlangin SP, Gaurav Tyagi chuan Police te hnathawh dan leh venhimna kaihhnawiha hma an lak dan te a sawi bawk a ni.

Chief Secretary hian Saitual a panna ah hian Seling-ah Saansad Adarsh Gram Yojana (SAGY) hnuaia project hrang hrang te tlawhin Saitual-a hun a hman hnuah Tam Dil a tlawh a, hemi hnu hian NESIDS (OTRI) hnuaia District Hospital Saituala sak mek pawh tlawhin heng hmalakna hrang hrang a tlawhna ah hian Department hotute leh thawktu ten an lo dawngsawng a, an hmalakna te an lo hrilhfiah bawk a ni.