Sawrkar, Tlawmngai pawl leh Kohhran huaihawtin Serchhip-ah Ruihhlo ngaite pual Gospel Camping neih tum
.jpeg)
Ruihhlo ngai te puala Gospel Camping neih tur chungchang ah hian nimin khan District Bawrhsap Paul L. Khuma hovin Serchhip DC Meeting Hall-ah sawrkar Office hrang hrang hotute, Kohhran hrang hrang aiawhte leh tlawmngai pawl hruaitute an thukhawm a, he thutkhawm ah hian Bawrhsap Paul L. Khuma chuan Nasha Mukt Bharat Abhiyan Drug Free India hnuaiah ruihhlo do dan tur ruahmanna thla ruk (6) chhung atana Action Plan an buatsaih thu leh an ngaih pawimawh ber chu ruihhlo ngai ten an sim theihna tura Gospel Camping neih dan tur ruahmanna siam a nih thu a sawi a. Kohhran, tlawmngai pawl leh Office tinah an ngaihdan te an zawhkual thu leh a tam berin Camping neih ngei tha an tih thu an thlen avangin he thutkhawm hi koh a nih thu a sawi a ni.
He thutkhawm a tel te hian ruihhlo ngai te puala Gospel Camping neih ngei chu tha tiin a bawhzui turin Organising Committee pawh Addl. DC Lalrinzuala kaihhruaina hnuaiah an din nghal bawk a. Meeting chuan Kohhran pawl hrang hrang te, tlawmngai pawl, mimal thahnemngai te bakah Office tinah he Camping pual hian Vehbur khawn nise tiin rel a ni a. A hun tur atan January 2026 chu tinzawn niin a hun leh hmun tur hi Organising Committee relfel tura dah a ni.
Bawrhsap chuan Office leh pawl hrang hrangte he Camping puala an inhawnna lawmawm a tih thu a sawi a. CMO leh District Medical Superintendent ten Medical lamah tanpui an inhuam thu te, Police Department in Security mamawh a nih chuan an lo inruat tur thute, Kohhran lam pawhin a tul apianga tha thawh an inhuam thu an thlen te chu lawmawm a tih thu sawiin, ruahmanna a hlawhtlin ngei theih nana tun atanga tawngtai turin kalkhawm te leh Serchhip District mipuite a sawm a ni.
.jfif)
Comments
Post a Comment
I ngaihdan i sawi hian mipui ngaihdan i tarlang a ni!