GIS-Based Lunglei Master Plan sawihona nei

Lunglei Town Planning & Development Committee chu nimin khan Lunglei Municipal Council (LMC) BoC Hall-ah thukhawmin, ram awmdan leh mihring pun zel dante thlir chunga Lunglei khawpui ruangam leh hmasawn dan tur ruahmanna, ‘Geographic Information System (GIS)-Based Lunglei Master Plan’ chungchang an sawiho a. He hunah hian mithiam ten ruahmanna an siam dan te a lem nen tarlangin, Risk-Informed GIS-Based Master Plan for Lunglei Town hnuaiah hian kum 2045 thlirin Lunglei khawpui tan Master Plan duan a ni a. Khawpui than zel dan tur leh hmasawnna hna thawhte felfai leh awmze nei taka kalpui a nih theih nan tun dinhmun zirchianna (survey leh data collection) uluk taka kalpuiin, mipui leh Department-te nena inrawn chunga ruahmanna siam tum a ni a. Kumin 2025 chhung ngeiin In tina kalchilha zirchianna (Household Survey) zawhfel hman tum a ni.