Dampa Bial-a Assembly by-election ah MNF Candidate Dr. R. Lalthangliana thlantlin a ni

Mamit District chhunga Dampa Bial-ah Assembly by-election chu tluang taka neih zawh niin MNF Candidate leh an Party Sr. Vice President Dr. R. Lalthangliana chu thlantlin a ni a. MLA atana thlan thar Dr. R. Lalthangliana chuan Dampa Bial hmasawn theih nan theihtawp a chhuah tur thu a sawi.

Tun thla ni 11-a Dampa Bial Assembly by-election neih a Vote tla te hi nimin khan Mamit DC Conference Hall-a Counting Hall-ah tluang taka chhiar zawh a ni ta a, MNF Candidate leh Minister pawh lo ni tawh Dr. R. Lalthangliana hian Vote 6981 hmuin amah hnaih bertu Rorellai ZPM Party Candidate Vanlalsailova chuan Vote 6419 a hmu a, Dr. R. Lalthangliana hian Vote 562-a hmu tam zawkin thlantlin a ni. He inthlan ah hian Congress Candidate John Rotluangliana chuan Vote 2394 hmuin BJP Candidate Lalhmingthanga chuan Vote 1541 a hmu bawk a, MPC Candidate K. Zahmingthanga chuan Vote 50 hmu bawkin NOTA-ah Vote 45 a tla bawk. Dampa Bial-a thlantlin MNF Candidate Dr. R. Lalthangliana hian Vote tla zawng zawng atanga chhutin za zela 40 a hmu phak a, amah hnaih bertu ZPM Candidate Vanlalsailova’n vote za zela 37 hmuin Congress Candidate John Rotluangliana’n vote za zela 14 leh BJP Candidate Lalhmingthanga’n vote za zela 9 an hmu a. He inthlanna a thlantlin Dr. R. Lal-thangliana hi Returning Officer Malsawmzuala chuan Member of Legislative Assembly nihna Certificate a hlan nghal a ni.

Dampa Bial by-election hi Mizoram Politics-a By-election inthlanah eptu party an chak vawi thumna a ni a, kum 1983 khan Indian National Congress Ticket in Phuldungsei Assembly Bial-ah Liansuama chuan rorellai PC Party Ticket-a ding chu a lo hneh tawh a, kum 2021 khan tuna Chief Minister Lalduhoma chuan Serchhip Bial-ah rorellai MNF Candidate chu hneh ve lehin tun tumah pawh eptu party Candidate in hnehna a chang ve leh a. Heti hian tun dinhmunah Mizoram Legislative Assembly-ah rorellai ZPM Party chuan MLA 27 an nei chhunzawm dawn a, MNF in MLA 10 neiin BJP in MLA 2 an neih bakah Indian National Congress in MLA pakhat an nei dawn a ni.

Dampa Bial Assembly by-election a thlantlin Dr. R. Lalthangliana chuan Dampa Bial hmasawn theih nan theihtawp a chhuah tur thu sawiin, Lalrintluanga Sailo in hmasawnna tura hmachhawp a lo neih tawh te tih hlawhtlin chu a tum hmasak tur a ni tih a sawi a. Pathian leh a thlang tlingtu mipui hnenah lawmthu sawiin, Party-a a thawhpuite nen theihtawp an chhuahna zara tling a nih thu sawiin, Dampa Bial-a vote percentage sang tak chu democracy hlutna lantirtu a ni tih a sawi a, inthlan an ngaih pawimawh avangin lawmthu a sawi bawk a ni.

Dr. R. Lalthangliana chuan a Campaign chhungin Dampa Bial-a khaw 30 chuang chu vawi 6 lai a fang chhuak tih sawiin, an harsatna lai leh hmasawn an ngaihna laiah khawtlang hruaitute rawnin theihtawp chhuah zui a tum thu a sawi a, kawng hrang hrangah hmasawn turin tan an la dawn tih a sawi bawk.

Dampa Bialtu MLA atana thlan thar Dr. R. Lalthangliana hian kum 1986 khan MNF Party zawmin Party chhungah nihna leh chanvo hrang hrang a lo chelh tawh a, tunah hian MNF General Hqrs. ah Sr. Vice President niin, Term ruk (6) zet MLA ni tawhin Lunglei North Bial-ah a zâwnin term 5 chhûng MLA-ah thlantlin a ni a, hemi hnu hian South Tuipui (Hnahthial) Bial-ah term khat tlingin Mizoram MLA zingah chatlak awm lova mahni Bial-a tling rei ber a ni. Term 6 chhung MLA a nih chhung hian Dr. R. Lalthangliana hian Cabinet Minister hna pawh term thum a chelh a, heng ah hian Department hrang hrang enkawlin chak takin hna alo thawk tawh a, tunah hian Dampa Bial-ah thlantlin leh niin hei hi MLA atana tum sarih (7) thlantlin a nihna a ni.