RWFPC Ltd. ten thlai sawng-bawlna khawl bun thar thlirho

Mizoram District 7-a khaw 154 zet tuamtu Ropuiliani Women Farmer Producer Company Ltd. chuan nimin khan Annual General Meeting neiin an hmalakna a Sawhthing sawngbawlna khawl bun thar chu an thlirho bawk.
Chhingchhip MIFCO Complex-a Ropuiliani Women Farmer Producer Company Ltd. Annual General Meeting hi Company CEO Henry Saingura chuan kaihruaiin he Company lo indin chhoh dan leh an hmalakna te a tarlang a, he Company kal zelna tura hmathlir leh hmachhawp an neih te sawiin, Company tana theihtawp chhuah zel turin he huna kalkhawmte chu a chah bawk a ni.

Nimin-a Annual General Meeting vawi 5-na an hman hi Mizoram State Rural Livelihood Mission (MzSRLM) atangin State Mission Manager Vanlalhmangaiha chuan hmanpuiin he Company bul an lo tan dan leh hri leng avanga a tir lama hma an lak chak theih loh dan te a sawi a. Company hmalakna hrang hrangte a thlawhtlin theihna tura theihtawp chhuah turin he huna tel te chu a chah bawk a ni.

Ropuiliani Women Farmer Producer Company Ltd. hi kum 2021 October khan MzSRLM bultumin din a ni a, Self-Help Group te hamthatna tura din niin tunah hian District 7-a Block 16-a khaw 154-ah inzarpharh tawhin Member 5335 an neih mek thu an sawi a. An Member te hnen atangin Sawhthing, Hmarcha leh Aieng te lei sakin tunah hian Chhingchhip-a MIFCO hmun-ah Warehouse leh Processing Center an din a. Nimin-a kalkhawmte hian he an khawl thar hi thlir hovin a hnathawh theih dan tur leh a tangkai dan turte an inhrilhfiah bawk a ni.

Nimin-a Ropuiliani Women Farmer Producer Company Ltd. Annual General Meeting-ah hian Board of Director te leh 12th Subscribers te bakah Member te aiawh Palai te telin Board of Director thlanna an neih bakah kum 2024-2025 Audited Statement chu an pawm bawk a ni.