Halpuah leh halmawi khap

Aizawl District Magistrate Er. Lalhriatpuia chuan BNSS 2023 Section 163 in thuneihna a pek angin Aizawl District huamchhungah Halpuah, halmawi leh a kaihhnawih te lak luh, zawrh, kawl leh hal khap tlat a nih thu tun thla, Oct. 14, 2025 khan thupek chhuahin a tarlang a. He thupek-ah hian Diwali kan lo thlen leh dawn tak thu leh ‘Festival of Light’ a nih angin halpuah leh halmawite hal thin a nih thu tarlangin, “Amaherawhchu heng halpuah leh halmawite hian nasa takin boruak a tih bawlhhlawh bakah ri bengchheng a siam a. Lung lama harsatna nei te tan nun tiraltitu niin damlo leh upa lam tan thawk lamah harsatna a thlen thei bawk a ni,” tiin halpuah leh halmawi avanga boruak chhia leh ri bengchheng laka mipuite an him nan he thupek hi chhuah a nih thu a tarlang a ni.