Aizawl-a Sipai chhuahsan ram za zela 39.33 chu mipui mamawh sakna tur atan ruahman a n

Advisory Committee on Assam Rifles Land chu nimin khan thukhawm lehin ruahmanna thar ber ang chuan Aizawl-a Sipai chhuahsan taka ram zawng zawng zaa 39.33 chu mipui mamawh hmunhma sakna (built-up area) tur niin a dang zawng zaa 60.67 chu Green Area a ni ang.

Assam Rifles chhuahsan ram hman dan tur ngaihtuahtu, Advisory Committee on AR Land chu nimin khan Chief Minister Lalduhoma hovin CM Conference Hall-ah an thukhawm a, he hunah hian Assam Rifles chhuahsan ram hman tangkaina tura rawtna hrang hrang thlirho niin Aizawl Square, Ring Road ni nghal siam te, a ram chhuah lama by-pass road, hmar lamah Saron atanga kal, Dak Inpui bula chhuak sial te, mi 2000 lenna Convention Centre, a hnuai lam lirthei park-na lian tham tak nei sak te, kawngpui kam hmun hniha Mini Park siam te, Two Wheeler parking siam te, Heritage Court siam te, By-pass road kiang Venghlui lam hnaiha Multi Level Car Parking leh Open Air Theatre sak te a pawm a. Khawpui laili chawmtu turin Baja tlang-a Tui dahkhawlna sak leh chhuah lam by-pass road kianga 33 KV Sub Station dah an remti a. Ruahmanna thar ber ang chuan a ram zawng zawng zaa 39.33 hi mipui mamawh hmunhma sakna (built -up area) tur niin a dang zawng zaa 60.67 chu Green Area a ni ang.

He Meeting-ah hian Master Plan siam that chu thlir leh niin tuna kawngpui awmsa chu a theih ang anga tihzauh relin, lungphun awmsate vawnhim tha an ti a, Canteen kual-a War Memorial chu MINECO-a sawn relin Aizawl Civil Hospital tihzauh nana Aizawl Police Station awmna hman a nih theih nan Police Station chu AR Hospital tlang-a sawn lo rel tawh chu a hmunhma tura an tinzawnah a leng thei dawn lova, hei vang hian Aizawl Police Station chu sawn chi ah ngai lovin Out-Post dah chi zawk nia ngaih a ni a.

Khatla-a Assam Rifles ram mawng lam, Mizoram Secretariat tihzauh theihna lai tur leh Loch House, tuna Mizoram sawrkar kuta awm ta te chu inthleng dilin, a hlawhtlin chuan Chief Minister's Office leh Residence sawn nana hman ni se an ti a. Hei hi CM Office-ah Meeting a tam thin avang leh Secretariat atanga kal te Traffic jam avangin a hautak thin avanga he harsatna pumpelh nana Chief Minister hmunhma chu MINECO lama suan phei thaa ngaih vang a ni a. Babu tlang-a AR ram chhuahsan, Zarkawt khawtlangin enkawl an dil chu a neitu nihna nei lova Green Park atana an enkawl theih dan tur inkaihhruaina GAD lamin lo duang se an ti bawk.