Aadi Karmayogi Abhiyan-ah Special Gram Sabha nei

Sawrkar laipui-a Ministry of Tribal Affairs hnuaiah Aadi Karmayogi Abhiyan chu kalpui mek niin Tribal khua chawikanna tur leh hmasawnna hmathlir siam nan Serchhip District chhunga Keitum chu Pilot Village-ah thlan a ni a, nimin khan Vantlang Inkhawm, Special Gram Sabha koh niin an khaw chhung hmasawnna atana ruahmanna hrang hrang relho a ni.
He Special Gram Sabha hi Keitum-a Sawngkhara Hall-ah neih niin Neeva Boro, Senior Assistant at the National Scheduled Tribes Finance and Development Corporation (NSTFDC) chuan MoTA aiawhin a hmanpui a. Dr Marilyn Lalruatkimi, District Nodal Officer chuan kaihruaiin Dr. Malsawmtluanga Fanchun, BDO & Block Nodal Office leh Neeva Bora ten Scheme nihphung te an sawi a, Stephen Laltlansanga Auhmun, District Master Trainer pawhin he Scheme in a tum te a sawifiah a ni.

He hunah hian khaw hmasawnna atana thawh dan tur Village Action Plan chu pharh niin mipui te nen sawiho a nih hnuah pawm a ni. Khawtlang mipui 80 aia tam an tel a ni.

Sawrkar laipui hmalakna Aadi Karmayogi Abhiyan hnuaia thlanchhuah khaw hrang hranga hmalakna tur ruahmanpui tur hian Serchhip leh East Lungdar Block atan Block Master Trainer (BMT) 12 ruat niin, District Process Lab-ah training pek an ni tawh a. BMT-te kaihhruaina hian khaw tinin Vantlang Rorelna ah an khuaa hmalakna tur, ‘Village Action Plan’ an duang ang a, sawrkar ruahmanna (scheme) hrang hrang kaltlanga hmasawnna hna thawh chu he ‘Village Action Plan’ mil hian kalpui a ni ang. Serchhip District-ah hian khaw 23 an tel a ni.