ZORO in Forest (Conservation) Amendment Act 2023 ngaihtuah tha tura Special Session ko turin sawrkar an ngen
ZORO chuan Mizoram State Legislative Assembly-in Mizoram-a hman tura Forest Conservation (Amendment) Act 2023 a pawm (adopt) chu Zofate pawi sawina lian tak leh harsatna nasa tak thlen thei a nih thu sawiin, Special Assembly ko-a ngaihtuah tha leh tura sawrkar an ngen thu an sawi.
Zo Re-Unification Organisation (ZORO) hruaitute hian nimin khan Aizawl Press Club-ah thuthar thehdarhtute kawmin ZORO Vice President L. Ramdinliana Renthlei chuan Mizoram State Legislative Assembly-in Mizorama hman tura Forest Conservation (Amendment) Act 2023 a pawm (adopt) chu Zofate pawi sawina lian tak leh harsatna nasa tak thlen thei a nih thu sawiin, Special Assembly ko-a ngaihtuah tha leh tura sawrkar an ngen thu a sawi a, sawrkarin a ngaihtuah tha lo a nih chuan a tawp thlenga hmalak an tum thu a sawi a ni. ZORO hruaitute chuan FCAA 2023-in ngaihhnathiam tura a dahah International boundary atanga km 100 chhung chu Central Sawrkarin a duh anga a hman theih turin, State sawrkar leh Village Council/Gram Sabha, NGO te rawn hauh lo pawha a hman theih turin thuneihna a la tih sawiin, Forest clearanace lak buai ngai hauh lovin hma a la thei tih an sawi a, Indian Constitution Article 371G-in Mizoram a humhimna tura dan a pek zawng zawng a kalh fai vek a, chanvo a pek a rapbet vek tih le, Indigenous Peoples te chanvo chhuhsakna a nih thu an sawi bawk a ni.
Heng bakah hian FCAA 2023 hian Indian Constitution Article 244 a kalh thu leh he Article hmanga siam Fifth leh Sixth Schedule in heng ADC, UT leh State te thuneihna leh dikna chanvo a pek chu a chhuahsak niin an sawi a, Indian Constitution Article 19-na pawh bawhchhia in he Article in chanvo min pek, Freedom of Residence and Settlement, Freedom of Occupation, Trade, Profession te a bawhchhia tih an sawi a. Heng bakah hian India Constitution Article 21-na in chanvo min pek heng- Zalenna, Tribal-te ramngaw-a an eizawnna, hriselna tha leh boruak thianghlim, Environment, mimal tinte dikna chanvo a tichhe thei nia sawiin, Tualto hnamte tana inhumhimna tur, UN Declaration on the Rights of Indigenous People(UNDRIP) 2007, Article 13, 15(2), 17(2), 21(1), 24(1) leh 25 chu nasa takin a bawhchhia niin an sawi bawk.
ZORO hruaitute chuan FCAA chu Supreme Court pawhin a ngaihtuah lai mek a nih thu sawiin, Court pawhin thuthlukna a la siam theih loh lai leh Line of Control pawh an la sawi-fiah theih loh laia Mizoram sawrkarin a lo pawm ngawt chu a fel lo hle tih sawiin, “Thangthar lo awm zel turte hmakhua a tichhe thei dawn a, he thil hi Zofate pawi sawina lian tak a ni,” a ti.
ZORO hruaitute chuan Mizoram leh hnam tan a him lo nia an hriat avangin Forest Conservation (Amendment) Act, 2023 chu an pawm thei lo tih sawiin, Mizoram Sawrkar chuan Central beng a thlen hma ngeia ngaihtuah tha leh se an duh thu leh, a tul anga Special Assembly pawh ko a ennawn leh turin Mizoram Sawrkar an ngen thu a sawi a, Mizoram Sawrkarin a ngaihtuah tha lo a níh chuan ZORO chuan a tawp thlengin hma a la zel dawn tih a sawi a. FCAA 2023 hian kan Fundamental Right a bawhchhiat avangin Indian Constitution Article 13 sawi anga tihtawp mai emaw, Indian Constitution-in dikna chanvo min pek anga herrem chi nia a lan thu an sawi bawk.
Hetihlai hian MNF Party hruaitute chuan niminpiah tlai khan Assembly Speaker chu a Pisa-ah hmuin Forest (Conservation) Amendment Act 2023 chu kan ram leh hnam tana thil thalo leh kan ram Central sawrkar kut a Dan hmanga hlanna a ni tih sawiin, Special Assembly Session rang taka ko a, Forest (Conservation) Amendment Act 2023 adopt-na Resolution chu sut leh ngei an phut thu an sawi a, chumi tur chuan rang taka Special Assembly ko a hma la turin an ngen bawk.