Civil Sub-Division ah Independence Day hman a ni
Thenzawl-ah chuan chawhma dar 11:00-ah Lothazawl Field-ah India Independence Day hi lawm niin Adviser to Chief Minister TBC. Lalvenchhunga MLA chuan khuallian niin hnam puanzar pawt pharhin Parade Contingent te chibai buk a chhanglet a. Independence Day lawm tura Thenzawl mipui kalkhawmte chibai bukin, Thenzawl khawchhung a sawrkar Department leh Office hrang hrangte hnathawh tha leh langsar a sawi lang a, zirna leh infiamna lama Thenzawl khaw tihmingthatu te hnenah chawimawina a hlan bawk.
Thenzawl-a Independence Day lawmna ah hian Parade Contingent 18, Armed Contingent pakhat leh Un-Armed Contingent 17 an tel a, Thenzawl HSS chu pakhatna niin Govt. Lal-lengvunga H/S leh Govt. Senior Secondary School ten an dawt a ni.
Nimin vek khan North Vanlaiphai-ah pawh Independence Day lawmna hi neih a ni a, hun hmasa chu North Vanlaiphai Sanpoh Kawn-ah hmangin SDO (Civil) Dr. Peter Malsawm-tluanga chuan Hnam Puanzar pawtparhin he huna tel te hian India Hnam hla an sa a, SDO (Civil) chuan he huna kalkhawmte chibai bukin, kum dang zelah pawh Independence Day chu ropui hman zel a that thu a sawi a. North Vanlaiphai khawchhunga sawrkar Department hrang hrangte hmalakna te a tarlan bakah North Vanlaiphai Police Station-a OC, SI JB.Lawmsanga chuan Dan pawimawh chi hrang hrang a zirtir a ni.
Chawhnu lamah Rahsi Veng Volleyball Court-ah Independence Day lawmna hi neih leh niin he hunah hian YMA Branch te’n Cheraw Lam hmanga intihsiakna neiin Independence Day Volleyball Tournament (Mipa leh Hmeichhiae) Final khelh a ni bawk.