Aizawl-ah North East NSS Festival 2025 neih tan a ni

Zonuna Kawlni /

India hmarchhak-a National Service Scheme (NSS) Volunteer te intawhkhawmna, ‘North East National Service Scheme (NSS) Festival 2025’ hawnna chu nimin khan Art & Culture Auditorium, Berawtlang-ah neih a ni a, Sports & Youth Services Minister Lalnghinglova Hmar chuan khuallian niin a hmanpui a ni.

Mizoram Sports & Youth Services Department hnuaia State NSS Cell leh Ministry of Youth Affairs & Sports hnuaia Regional Directorate of NSS te buatsaih ‘North East National Service Scheme (NSS) Festival 2025’ hawnna hunah hian Sports Minister chuan Mizoram in NE NSS Festival 2025 a thleng chu lawmawm a tih thu sawiin, NSS chu thalaite hnena zirlaibu pawnlama thil pawimawh zirtirtu, khawtlanga an mawhphurhna hriattirtu a nih thu sawiin, Mizoram-ah ngei pawh NSS hnathawh rah chu awmze nei leh hmuh theihin a awm tih a sawi a. NE NSS Festival 2025 chu hnamzia leh tobulte inzir-tawnna atan leh thian tha leh inthlunzawmna tha siamna atana hmang turin hmarchhak state hrang hrang atang lo kal NSS volunteer-te chu a chah a. Ram in a mamawhna au aw chu NSS kaltlanga chhang a, khawtlang khaichhuahna atana an theih ang tawka an thawk chu lawmawm a tih thu sawiin, NE NSS Festival chu hlim tak leh hlawk taka hmang turin duhsakna a hlan a ni.

Regional Directorate of NSS (NER), Guwahati-a Regional Director D. Carthigueane chuan NSS chu zirlaite inhmanna liantham berte zinga mi a nih thu leh Volunteer mtd 4 vel an nei mek tih sawiin, tun atanga reilote ah volunteer mtd 6.5 an tling thei tura ngaih a nih thu a sawi a. Regional Directorate of NSS (NER)-a Youth Officer N.C. Deori pawhin kum 2014-a hman tan a nih atanga tun thlenga NE NSS Festival hman a la ni thei chu lawmawm a tih thu leh kum 2047 hmaa India ram Developed Country a hlankai a nih theihna atana hmalakna, Viksit Bharat, zulzuia inhmakhua nan pawh he Festival hi a pawimawh thu a sawi a ni.

North East NSS Festival hian ni nga chhung, August ni 5, 2025 (Thawhlehni) atanga August ni 9, 2025 (Inrinni) thleng neih tur a ni a, Hmarchhak state hrang hrang - Mizoram, Assam, Manipur, Nagaland, Tripura, Sikkim leh Meghalaya atangin NSS volunteer 250 vel leh Programme Officer-te a hmuna riakin an tel a. Arunachal Pradesh atangin an rawn tel thei lo thung a. He Festival in a tum ber chu hmarchhak state-a thalaite’n inpawhna tha an neih theih nana hruaikhawm a, NSS kalhmang leh thiltumte hrilhhriat a, an kal zelna atana tangkai tur zirtir a ni.

Mizoram-ah chuan kum 1972 khan NSS Unit hi din tan a ni a, tunah chuan zirna In 103-ah NSS Unit din tawh niin kum 1988 khan State NSS Cell chu din a lo ni tawh bawk a ni,

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Kawng siam dawn hnai

Zonuna Kawlni /
Image
National Highway-02 siam a nih hnuah he kawngpui in Serchhip Town chhunga a paltlang tawh loh, Chhiahtlang leh Serchhip khawpui chhung kawngpui siamthat hna chu PWD Serchhip Division ten an thawk dawn hnai nia thudawn niin hemi atan hian sum pawh ruahman a ni tawh nia thudawn a ni a. Tun tumah hian khawpui chhung paltlangtu Kikawn leh Sailiamkawn inkar chu Bituminous concrete a siam tum niin kawng siam hi zawhfel a nih hnuah chuan thla ruk (6) chhung Road cutting phalna pekchhuah a ni dawn lo a ni. Tun tuma kawng siam hna thawh turah hian New Serchhip North VC huamchhunga kawng kual nasa lutuk chu paih turin ruahmanna siam a ni bawk nia thudawn a ni.
Kimchang zawkin »

SEDBA hruaitu an thlang

Zonuna Kawlni /
Image
Serchhip District Boxing Association chuan kum 2026-2028 chhunga an hruaitu thlanna neiin President-ah C. Biakchhawna (New Serchhip) Sr. Vice President-ah BC. Liantluanga (Tuikhuah Veng); Vice President-ah R. Vanlalpeka (Vengchung), Secretary-ah David Laldintluanga (New Serchhip) Joint Secretary-ah T. Lalhuthanga (New Serchhip) leh V. Zosangliana (Leisang Veng); Treasurer-ah Prem Lalhmangaiha (Chanmari Veng) leh Fin. Secretary-ah David Lalrinmawia (P&E Veng) te thlan an ni.
Kimchang zawkin »

DIET Serchhip ten an titha

Zonuna Kawlni /
Image
Mizoram Board of School Education (MBSE) chuan nikum (2025) December thlaa Diploma in Elementary Education (D.EI.Ed) Examination a buatsaih result chu niminpiah khan a tichhuak a. District Institute of Education and Training (DIET) Serchhip-a Training mek te pawh an tha thawkhat a ni. DIET Serchhip atang hian 1st Semester-ah zirlai 48 ten Exam beiin mi 39 an pass a, a za zela 81.25 pass ang niin zirlai 9 ten Subject bat an nei a. 3rd Semester-ah zirlai 49 ten exam beiin an vaiin an pass vek thung a ni.
Kimchang zawkin »