MNF President in an chak zual zel tih a sawi

MNF President Zoramthanga chuan MNF Party chu Pathian in kum 64 a hruai tawh tih sawiin, “Kan chak zual zel a ni,” a ti.

Nimin khan MNF Party hian Aizawl-a Mizo Hnam Run-ah Chhung Inkhawm neiin he hunah hian an President Zoramthanga chuan Party mite chu hre reng tura a duh thu pawimawh chahin, “MNF dam khawchhuahna hi Lalpa rawngbawl tur leh, ram leh hnam Pathian tana vawnghim a, tihhmasawn a ni, tih hi MNF zawng zawngin vawng reng turin ka duh a ni,” a ti a. “MNF kan sawrkar a, kan tla leh thin a, kan sawrkar leh thin a. Heng te hi kan tan a tha a ni. Kan insiamthat nan leh kan inzirfin nan kan tla thin te hi a tha a ni,” a ti a. “Mizoram-ah Political Party 30 chuang a lo ding tawh thin a. Tun thlenga hnam party la ding awmchhun hi MNF chiah kan ni. Mizo Union leh PC te kha ral thei lo tura mawi an ni, an chak em em a. Mahse, an awm ta lo. MNF erawh kum 64 Pathian in min hruai ta a, kan chak zual zel a ni,” a ti.

MNF President chuan MNF party chu harsatna a tawk lo bik a ni lo tih sawiin, “Harsatna tam tak karah pawh 'Pathian leh kan ram tan' tia Pathian hming kan lam tlatna chu Pathian in mal a sawm a ni. Isua van-a a lawn dawna thu min pek 'thilsiam zawng zawng hnena chamchintha hrilh' hi MNF innghahna leh thil tum bulpui ber a ni a. Hei hi MNF mi leh sa zawng zawng chuan vawwg tlat turin tun hunah hian ka chah duh a ni,” a ti bawk.

MNF President Zoramthanga chuan ama chanchin ziahna lehkhabu 'From Rebel To Leader' tih chu khawvela publishing company lian ber pawl Penguin-in an chhuah sak dawn tih pawh sawiin, a lehkhabu a chhuah hunah zalenna sual laia thil thlen dan dik tak a hriat theih dawn tih a sawi bawk.