Chief Minister in sawrkar laipui mi pawimawh te Mizoram mamawh hrang hrang a sawipui

New Delhi-a cham mek Chief Minister Lalduhoma chuan sawrkar laipui-a Minister te kawmin Mizoram mamawh hrang hrang a sawipui.

Chief Minister Lalduhoma hian nimin khan Union Minister of State for Fisheries, Animal Husbandry and Dairying George Kurian chu a Pisa-ah kawmin Sangha khawi leh ranvulh kawnga hmasawnna tur Mizoram in project a thehluh hrang hrang te an sawidun a. Pradhan Mantri Matsya Sampada Yojana (PMMSY) hnuaia proposal panga (5) Mizoram in a thehluh tawh te - Integrated Aqua Park, Zawlnuam a dinna tur project te, Chakma Autonomous District Council-a project te, Mizoram Fish Farmers, Animal and Husbandry, Dairy Producers and Marketing Association Project siam te, Mizoram Cooperative Fish Farming Marketing and Processing Federation Limited Project bakah Lai Autonomous District Council Project siam te chu a ranglama pawmpui tur leh sanction thuai turin Union Minister hnenah hian a thlen a. Union Minister of State hian heng project te hi a lo enzui tur thu leh a lo bawhzui tur thu Chief Minister hi a lo hrilh a ni.

Chief Minister hian niminpiah khan Union Home Minister Amit Shah chu a Pisa-ah hmuin an inkawm bawk a, he hunah hian Handholding Scheme, Thenzawl Peace City leh project lian danga Mizoram in sum a mamawh te an sawidun a. Home Minister chuan Parliament Session lo awm leh turah an ngaihtuah tur thu lo hrilhin; Union Finance Minister, Union Home Minister leh Chief Minister te nena sawi tlâng a, tihhlawhtlin dan kawng dap nise an ti bawk. Hei bakah hian ‘The Mizoram (Maintenance of Household Registers) Bill 2019’, President of India hnena la tang mek chu President pawmpuina hmuh a nih vat theihna tura a lo bawhzui tur thu te, AAI hnena Lengpui Airport hlan chungchang pawh Union Cabinet in an lo ngaihtuah tur thu te a lo hrilh a. Mizoram-ah Helicopter lian zawk leh mi phur tam thei zawk dah tura Chief Minister ngenna chu a lo bawhzui tur thu leh Lengpui Airport-a CISF duty te tihchangtlunna tur Police Modernisation Scheme hnuaia Fund dilna te pawh enzui a lo tiam a ni.