Thenzawl-a Horticulture College Academic cum Administrative Building sak thar chu hawn a ni
Union Minister for Agriculture & Farmers' Welfare Shivraj Singh Chauhan hian heng Building te hi Mizoram-a rawn kal-a rawn hawng tura ruahmanna siam a nih laiin khawchin in a zir loh avanga rawn kal thei lovin Online Video Conference hmangin a hawng ta zawk a, he hun hi Governor General (Dr) Vijay Kumar Singh chuan a Office atangin online-a lo zawmin Chief Minister Lalduhoma chuan Thenzawl-a hemi puala hun hman hi a telpui thung a ni.
Heng building hawnna hunah hian Union Minister Shivraj Singh Chauhan chuan Mizoram chu ram nuam, ram ralmuang leh thlai chi hrang hrang chin theihna ram tha a ni tih sawiin, Horticulture thlai tharchhuahna hmunpui ni thei khawpa ram tha a ni tih a sawi a. Amaherawh chu tlangram a nih vang te, leilung luangral chak lutuk vang te, kumtin Loneih bansan harsa kan tih vangte in chona lian tak a hmachhawn ve bawk tih a sawi a. “Heng kan hmaa chona awm te hmachhawna, kuthnathawktuten hlawkna leh hmasawnna ngelnghet an neih theih nan heng College pahnihte hi kan thuam tha zel a ni,” a ti. Central sawrkarin Mizoram loneitute leh kuthnathawktute tana hmalakna a neih langsar zual te a tarlang bawk.
He hunah hian Governor General (Dr) Vijay Kumar Singh pawhin Mizoram economy chu Agriculture leh a kaihhnawih dangte a innghat tlat a nih thu sawiin, Mizoram pumpui area atanga 55% chu Horticulture hmalak theihna a nih thu leh heng zinga 10% chauh a taka hman tangkai a nih thu a sawi a. FPO, Cooperative, Supply Chain leh Market mumal tak hmangin hmasawnna lian tham kan siam thei tih a sawi. Thenzawla Horticulture College din a ni chu sawrkar laipuiin Horticulture-a Mizoram theihna hriaa hmasawnna nasa zawk nei tura hma a lakna a ni tih Larsap chuan sawiin, “Hei hi 'Atmanirbhar Bharat' leh 'Vikshit Mizoram' ni tura hmalakna pawimawh a ni,” a ti a. Organic thlai tharchhuah kawngah tanlak a tul thu sawiin, Mizoram mai nilo khawvel market zau zawk thleng thei tura tanlak tlan a tul thu a sawi bawk.
Thenzawl Horticulture College Campus-a hun hman ah Chief Minister Lalduhoma chuan Central Agriculture University (CAU) hnuaia zirna In pawimawh pahnih, College of Veterinary Sciences & Animal Husbandry, Selesih leh College of Horticulture, Thenzawl te Mizoram in kan kawl tih sawiin, heng hmun pahnih ten hma an sawn zel a ni tih a hmuhin lawmawm a tih thu a sawi a. Heng zirna In te hi Mizoram leh India hmarchhak State-te tan mai bakah India ram pum tan pawha zirna hmun hlu a nih thu a sawi bawk a. Mizoram-ah Horticulture leh Animal Husbandry behchhana eizawng an tam thu leh kan farmer te hian hmasawnna tur an la ngah thu sawiin, Horticulture lama hmalak theihna ram kan la ngah thu a sawi a. Anni tanpui tur hian heng College pahnihte hian tih theih tam tak an neih thu a sawi bawk.
Nimin-a hawn tak College of Veterinary Sciences & Animal Husbandry, Selesih-a PG Girls Hostel thar hi zirlai naupang 57 awm theihna tur a ni a. Horticulture College Academic & Administration Building hi Mizopa chhiara chhawng nga (2) niin he Building-ah hian thawktute tan Office a awm bakah Classroom hrang hrang a awm nghal a. Conference Hall leh Laboratory bakah inthiarna leh mamawh hrang hrang te dah nghal a ni.
Thenzawl-a College of Horticulture hi kum 2016-a din niin thawktu mi 15 bakah zirlai 95 an awm mek a ni.
Comments
Post a Comment
I ngaihdan i sawi hian mipui ngaihdan i tarlang a ni!