Saiphai khua in Ration buhfai lakna kawng an siam

Kolasib District chhunga awm Saiphai khua chu an ration buhfai lakna kawngpui siam tha in Inrinni khan an hnatlang.

Vairengte Kudam atangin Bagha kaltlangin Saipum, Saiphai leh N. Chawnpui khua te hian Ration buhfai hi an khua ah an phurlut thin a, Vairengte atanga Phainuam kaltlangin Saiphai kawng NH-306 (A) a that hnuah, Assam lama kual kher lo in he kawngpui kaltlang hian heng buhfai hi an phur thin a ni. Kumin a ruahtui tla avangin hmun thenkhatah he kawngpui hi kal hleihtheih loh khawpa a chhiat tak avang leh lirthei ten harsatna an tawh thin avangin Saiphai Village Council huaihawtin Inrinni khan kawng chhe zual lai siamtha in an hnatlang a; PWD lamin kawngpui a phah tur Lung ngaihtuahin JCB an thawhchhuahpui bawk a ni.

Phainuam leh Saiphai inkar kawngpui hi kum 2017 khan siam a ni a, hemi hnu hian thawmthat a ni leh tawh rih lo a. He kawngpui hi Mizoram PWD enkawl niin, Short Term Maintenance thawk turin company kut a dah ni mah se, company lam hian an ngaihsak tawk lo a, Phainuam khawtlang hruaituten PWD Minister hnena thil awm dan an thlen hnuah PWD chuan tunhnai khan kawng khuar leh chhia hnawhna tur lung an dah a ni.