Sawrkar laipui duhdan angin Lengpui tumhmun-ah ramdang atanga lo zinte endik hna thawh tan a ni

Home Minister K. Sapdanga chuan sawrkar laipui duhdan angin Lengpui tumhmunah ramdang atanga lo zinte endik hna thawh tan a nih thu a sawi a. Protected Area Permit (PAP) leh Restricted Area Permit (RAP) te chu Online hmanga dil theih turin sawrkar laipui chuan a siam tawh a ni.

Home Minister K. Sapdanga chuan sawrkar laipui-in Myanmar ramri depa awm hmarchhak State pathum Manipur, Mizoram leh Nagaland-ah te Protected Area Permit (PAP) leh Restricted Area Permit (RAP) a thlahdulna a tihtawp leh tak avangin ramdang atanga India rama lo zinte'n phalna an neih lo endikna tur hi ruahman a ni a, hemi atan hian Lengpui tumhmun a thlawhna atanga lo thlengte luhna hmun bulah endikna hmun hi ruahman a ni tih a sawi a. Official lamin ruahmanna an siam tawh angin kalpui chhoh tur a nih thu a sawi bawk. Hemi chungchangah hian Mizoram sawrkar leh Ministry of Home Affairs (MHA) chu an inrawn tlang reng niin Home Minister chuan a sawi a, Protected Area Regime an tih mai hi kum 14 thlahdul a nih hnuah ram thenawm Myanmar leh Bangladesh boruak avangin a taka hman leh turin nikum December thla khan MHA chuan thupek a chhuah leh ta a ni.

Home Department hotute'n an sawi danin ramdangmi Mizorama lo zinte khuahkhirhna tuaithar leh a nih hnu hian RAP leh PAR hi online hmanga dil theihin MHA chuan a siam a, online hmang bawka phalna pek a ziahluh an ni tawh dawn a. He thil a taka kalpui tur hian Home Department chuan District tina SP-te bakah Foreigner Registration Officer, SP CID (SB) te pualin training a lo buatsaih tawh a. MHA hnenah pawh ramdangmi lo zinte ziahluh leh lo buaipui kawnga thiltih a awlsam theih nan Aizawl khawpui-ah hemi pual bik Pisa hi rawn din turin ngen a ni bawk.

Hemi chungchangah hian kumin March ni 10 khan Chief Minister Lalduhoma chuan sawrkar laipui inventhawnna chu a hriatthiampui thu Assembly inkhawmah a lo sawi tawh a. Nikum chawhnu lam kum chanve vel chhungin ramdang mi 2,000 chuang Mizorama lo lut si in khawlai-ah hmuh tur an awm lo niin a sawi a. A bikin UK mi, Russia leh Ukraine indona a kal pakhat chu Mizoram kaltlangin Myanmar ramah a lut a, hel pawlte indo dan a zirtir niin Lalduhoma chuan a sawi a. A lo haw lam silaimu nen Lengpui tumhmun-ah man ani tih a sawi a. Ramdangmi lo zinte khuahkhirh chu Mizoram sawrkar chuan tha ti lo chungin sawrkar laipui rilru erawh a hriatthiampui niin a sawi a ni.