UD&PA Minister in ni 5 awh tur ’Sanjha Utsav (SHG Mela) Festival of Togetherness’ a hawng

Urban Development & Poverty Alleviation Department buatsaih, ‘Sanjha Utsav (SHG Mela) Festival of Togetherness’ hawnna chu nimin khan Aijal Club Park-ah neih a ni a, UD&PA changtu Minister K. Sapdanga chuan he hun hi a hmanpui a ni.

Ni 5 awh tur Self Help Group Mela hawnna hunah hian UD&PA Minister chuan UD&PA Department kaltlanga khawpui chhunga chhungkaw khawsak dinhmun chawikan nana nu hovin an theihna leh thiamna chhungkhawma a huho a hma an lak thinna chu lawmawm a tih thu a sawi a. Hmasawn duhna leh hlawhtlin tum tlatna thinlungpu chunga tumruhna nena beitute tha tichaktu Department enkawltu nih chu phurawm a tih thu sawiin, rampum huap Exhibition buatsaihna a Mizoram atanga UD&PA enkawl SHG thlanchhuah an ni te chu lawmawm a tih thu a sawi bawk. UD&PA Minister chuan SHG-te tihmasawn zel tur hian UD&PA Department thawktute chu an inpeih reng thu tarlangin, hetihrual hian SHG-ten an tih ve tur, loan rulh ngaih pawimawh te, an hmalak dan tur ruahmanna felfai siam te leh thawhhona boruak tha siam te hlenchhuak zel turin a fuih bawk a ni.

Report-a tarlan danin Mizoram-ah hian kum 2014-15 Financial Year atang khan District Hqrs. leh Census Town thenkhatte nen khaw 15-ah Deendayal Antyodaya Yojana – National Urban Livelihood Mission (DAY-NULM) hi kalpui a ni a, an hnuaiah hian Self Help Group (SHG) 1520 an awm mek a ni. DAY-NULM hnuaiah hian Social Mobilisation & Institutional Development, Employment through Skill Training & Placement, Skill Development Training, Self Employment Programme leh Support for Urban Street Vendors-te kalpui thin a ni a. Skill Training paltlanga Certificate felfai tak nei mi 10733 zinga mi 5158-te chuan an thiamna zirchhuah hmangin hna an chelh mek a. Self Employment Programme hnuaiah hian mimal leh a huhoa eizawnna bultanna tur leh tihchangtlunna tur Bank atanga loan la 2024 an awm tawh a ni.

North East leh Himalayan Region zinga DAY-NULM hnuaia hma la tha State thlanchhuah ah Mizoram chuan kum 2021-22 leh kum 2022-23 khan Systematic Progressive Analytical Real Time Ranking (SPARK) Award lawmman pakhatna a lo dawng tawh bawk a. DAY-NULM kal lai mek chu kum 2024 September khan tihtawp a ni a, a thlakna tur ‘New Mission on Urban Poverty Alleviation’ chu Ministry lamin duangfel tawhin chumi tur atan chuan October 2024 atang khan India ram khawpui 25-ah Pilot Project kalpui mek a ni a, Aizawl pawh hi a tel ve mek a ni.

‘Sanjha Utsav – Festival of Togetherness’ hawnna hunah hian SGH hma la tha panga; Chawngtinleri SHG, Jenny SHG, Mass SHG, Nui hiau SHG leh Sari SHG-te hnen ah lawmpuina thilpek hlan a ni a. Mela hi March ni 10 atanga ni 14 thleng neih a ni dawn a, SHG kutchhuak thil chi hrang hrang phochhuahna Stall 27 leh eitur zawrhna Stall 7 a awm a ni.