Lawngtlai West Bialtu MLA in thubuai a neih a sawifiah

Lawngtlai West Bialtu MLA C. Ngunlianchunga chuan Chief Minister Lalduhoma'n thubuai a neih thu a sawi chungchang ah Anticipatory bail a la dawn lo tihn a sawi.

Nimin Assembly Session-a Chief Minister in thubuai neih thu a sawi chungchang ah nimin khan Aizawl Press Club-ah thuthar thehdarhtute kawmin Lawngtlai West Bialtui MLA chuan, “Thubuai ka nei tih ka lo hre lo, Chief Minister-in sawi chhuak lo se chuan ka lo hre lo ang. ACB lam ka zawt a, thubuai ka neih thu min lo hrilh. LADC CEM ka neih laiin Lawngtlai by-pass road kan buaipui a, DPR-te kan thehlut a ni. NLCPR atangin cheng vbc. 11 vel sanction kan hmu a, ka CEM laiin kum 2013 ah cheng vbc. 4.70 vel a rawn chhuak a. Minister ka nih tak avangin January 2014 ah CEM atangin ka bang a, ka hnu a mite'n an khawih zui,” a ti.

Lawngtlai West Bialtu MLA chuan a hnathawktu tur chu LADC Official-te'n inremna an ziahpui tih sawiin, “Zangnadawmna avangin hnathawh zawh a ni lo. Mimal ram vek paltlang tur a ni a, a Scheme-ah zangnadawmna pek theihna a awm si lo. CEM ka nih laiin ni 16.9.2013-ah ram neitute inremna ka siampui. Ram chauh neitute chu Rs. 20,000 theuh pek a, thlai neite chu an thlai man pek tel tur kan ti,” a ti a, a Scheme-ah awm lo mah se Council atanga pek dan zawn chu an rilru a nih thu a sawi bawk.

C. Ngunlianchunga chuan thubuai a nei tih hre lo mah se, ACB-te'n thu an zawhfiah ve thin thu sawiin, “CEM atanga ka ban tak daih avangin engmah ka hriatpui loh thu leh cheng khat pawh ka hriatpui loh thu ka lo hrilh thin. Kan ram tana tha tura hma ka lak vena, hnathawh theih a nihna atana ram neitute inremna ka lo siampui avanga thubuai hi nei ka nih hmel,” tiin ram hruaitute chuan ram tana thil tha a nih chuan engpawh an ti tur a ni tih chu a ngaihdan a nih thu a sawi a ni.