Serchhip-ah Chief Minister’s Inventors Challenge nei

Chief Minister’s Bana Kaih Scheme hnuaiah khawl thar siamtute tan Inventors’ Challenge chu nimin khan Serchhip DC Meeting Hall-ah buatsaih a ni a, he inelna atan hian Khawl siam dan tur idea chauh emaw, khawl siam tawh (prototype) emaw pawh pawm niin, mi 7 in an thil siamte an entir a ni.

Nimin-a Inventors’ Challenge-ah hian Addl. DC Lalrinzuala chuan inbuatsaihna hun chep tak kara Inventors Challenge-a tel te chu lawmthu hrilhin, an thiamnate ram leh kawtlang tana hlan zel turin a chah a. Tun tuma inelna hi a bul tanna chauh ni se a duh thu leh mi la siam chhuah ngai loh thil tha zawk la siamchhuak zel tura tan la zel turin a fuih a. An thilsiam leh an hralhchhuah te, hlep an neihte thlengin ziaka tha taka vawn nachang hriat a pawimawh thu a sawi bawk.

Nimin-a thil phochhuah te hi Addl. DC kaihhruaina hnuaiah hian endik nghal niin lawm-man sem nghal a ni a, a pumpui-ah Lalhruaitluanga, New Serchhip chu pakhatna niin Rs. 25,000/- a dawng a, Lalchhuangliana, Serchhip chu pahnihna niin Rs.15,000/- a dawn bakah pathumna  J. Lalremruata, Chhiahtlang chuan Rs. 10,000/- a dawng bawk a, heng mite hi State Level inelna ah an tel chhunzawm dawn a. Midang pali te hnenah Consolation prize hlan a ni bawk.