Sawrkar hmasa thil tih that mahni tih a sawi ah puh

Minister hlui K. Lalrinliana chuan Mizoram sawrkar chu sawrkar hmasa thil tih that te mahni tih anga sawi duh zel ah a puh.

    Nimin-a MNF in Mizo Hnam Run-a Chhung Inkhawm an neih ah Minister hlui leh MNF Adviser K. Lalrinliana chuan India ram State-ah Oil Depot nei lo awmchhun kan nih thu leh an hun lai khan neih ve tul an tih thu a sawi a, “A hmun turte Bairabi-ah ruahmanna kan siamfel a. Aizawl chhak lamah awm se tiin anmahni lamin an rawn rawt leh a. Department hrang hrangte nen Meeting neiin kan tifel a. A tak ram kan thleng tep a, inthlan a lo hun leh ta mai si a. Union Minister in hawng se tiin Prime Minister hriatpuinain rawtna kan siam,” a ti a. Hetihlai hian Session-a Minister-in 'Prime Minister hawn tir an tum' tia a chhanna chu mak a tih thu sawiin, “Vawi khat mah PM in hawng se tih kan sawi lo hrim hrim. Hna thawk ho lutuk leh engmah ti lo angah min puh kha a mak hle mai. Sawkar hmasa thil tih that pawh an tih angin an sawi duh zel. Kolasib Hospital pawh Pu Thangtea khan hawngin a hna pawh thawh zawh deuhthaw tawh a ni a, an bul tan angin Press Release an siam ngamte kha a mak ka ti. Rice Mill kan hawn tawh hun rei tak kalpui tawh pawh an sawrkar tharah an hawng thar leh. An kalphung hi ‘Kalphung thing’ a ni ringawt a lawm,” a ti bawk.