NIT Mizoram harsatna Parliament-ah sawichhuak

NIT Mizoram in hun rei tak atanga harsatna a tawh chungchang chu nimin a Parliament Inkhawm ah Rajya Sabha MP K. Vanlalvena chuan a sawichhuak.

Parliament Budget Session neih mek chu nimin khan a thawh hnihna atan chhunzawm leh a ni a, he thutkhawm ah hian Rajya Sabha MP K. Vanlalvena chuan Mizoram NIT chu India sawrkarin kum 2009-a NIT a din thar 10 zinga pakhat a nih thu te, a tirah chuan VNIT Nagpur atanga bul tan a nih thu te leh July 2011-ah Mizorama sawnluh a nih thu te a sawi a. Din tirh a nih atanga tun thlengin mahni puala building la nei lovin hmun hrang hrang Durtlang, Chaltlang leh Tanhril-ah te mimal building luah a la ngaih thu a sawi a ni. Rajya Sabha MP chuan NIT Mizoram chuan building sa tura an inbuatsaih tan laiin NIT ram, Lengpui chu Riverine Reserved Forest chhung ami a ni tiin Forest Department atangin Complaint a luh thu leh NIT chu sum tam tham tak chawi tura Forest in an phut avanga harsatna tawk an nih thu a sawi a ni.

He harsatna sutkian sak tura Union Minister of Forest and Climate Change Bhupendra Yadav a hnena a ngenna te tihhlawhtlin a nih avanga lawmthu sawiin Rajya Sabha MP chuan, NIT Mizoram in Forest Department hnena pawisa an chawi tur zat chu nasa taka tihhniam ni tawh mahse Mizoram sum harsatna hriat saka a bo a bang awm lova nuai bo sak turin Sawrkar laipui a ngen a ni.