Ni 80 vel ASF vanga Vawk thi leh suat awm tawh lo

Nikum December 23 hnu lamah Mizoram-ah African Swine Fever (ASF) vanga Vawk thi a awm tawh rih lo nia chhinchhiah a ni a, ni 80 dawn chu ASF vanga vawk thi leh suat chhinchhiah a awm tawh lo a ni.
AH & Vety Department in an chhinchhiah danin nikum February ni 9 khan Champhai District-a Leithum khua ah ASF hri vang hian Vawk thi 15 awmin hemi hnu hian khua leh Veng hrang hrangah Vawk thi hi a awm belh zel a, nikum chhung zawng khan ASF vang hian Vawk thi 14,950 chhinchhiah niin Vawk 24,177 suat a ni bawk a. Nikum kumtawp lam khan hri leng hi ziaawm chho in nikum December 23-a Kolasib District chhung Saipum khuaa Vawk thi a awm hnuah ASF vanga Vawk thi chhinchhiah belh a awm tawh lo a, ni 80 vel zet ASF vanga Vawk thi leh suat chhinchhiah a awm tawh lo a ni.

Serchhip District-ah chuan kum kalta 2024 chhung khan ASF hri leng hi Veng leh khua 31-a chhungkaw 2127 ten tuarin ASF vanga Vawk thi 3527 awmin Vawk 7069 suat a ni bawk a, nikum chhunga Serchhip District-a ASF avanga Vawk thi leh suat hi a vaiin 10,596 a ni.