Mizoram-ah UCC hman tumna a awm loh thu sawi

Chief Minister Lalduhoma’n Mizoram Sawrkarin Uniform Civil Code (UCC) hman tumna a nei loh thu House a hrilh.

Nimin-a Assembly thutkhawmah he thu hi sawiin Chief Minister chuan UCC chu Mizoram in na takin a dodal thin a, Sawrkar laipuiin barhluih a tum pawhin theihtawpin an tang dawn tih sawiin, Article 371G phena him turah an inngai tih a sawi a, Sawrkar leh Tlawmngai pawl hrang hrang nen tan ho a ngai tih a sawi bawk. Chief Minister chuan Protected Area Permit chungchang sawiin, nikum June leh December inkarah foreigner 2000 dawn an lo lut a, heng lo lut thenkhat hi Chin Hills lamah training an pe nia hriat niin American Ambassador pawh State sawrkar hrilh lovin a rawn lehlang tih a sawi a, tunlai Geo Politics-ah ram lian te en mek lai a ni tih sawiin, Mizoram chu foreigner kalkawng a ni mek a, Tourist pangngai ni lo tam lutuk chu India sawrkar ngaih a thatloh avangin Sawrkar laipuiin Protected Area Permit chu hman tan turin thu a pe tih a sawi a ni.

Chief Minister Lalduhoma chuan Free Movement Regime (FMR) chungchang pawh sawiin, zalen taka inkalpawh chuan thil tha lo a keng tel thin tih a sawi a, raltlan lokal te chu an enkawl tur ni mahse an awmna hmun a ralmuan hnuah pawh haw tum tawhlo tam tak an awm niin a sawi a, zalen lutuka inkalpawh chuan sual rawngbawlna tam tak a ken tel avangin Sawrkar laipui hmalakna Free Movement Regime (FMR) tihtawp pawh a tul rih ah an ngai tih a sawi bawk.