Ramsa leh Sava veh khap

Serchhip District chhungah Air gun/Air Rifle, Silai, Sairawkherh leh hmanraw dang hmanga ramsa leh sava veh khap a ni.

Hemi chungchanga December 30, 2024-a Serchhip District Bawrh-sap in thupek a tihchhuah ah chuan Thlasik kan lo chuankai leh tak thu leh heng hunlai hian mi thenkhat ten silai hrang hrang leh hmanraw dang hmangin kan rama sava pem chi, kan ram rawn paltlang thin sava te bakah kan rama sava awmsa te leh ramsa te an pel thin tih hriat a ni tih a tarlang a. Heng avang hian ramvak karah inkahpalh avanga nunna hial chan pawh an lo awm tawh thin thu tarlangin, “Kan chhehvela nungcha chi hrang hrang te tichereu mai lova humhalh an nih theih nan leh ramvah avanga nunna chan an awm loh nan thupek chhuah tulin ka hria,” tiin Section 163 of Bharatiya Nagarik Suraksha Sanhita, 2023 tlawhchhanin Serchhip District chhungah mi tumah in Air gun/Air Rifle, silai, sairawkerh leh hmanraw dang hmangin ramsa leh sava reng reng an vehin an kap/man tur a ni lo tih a tarlang a ni. He thupek hian Order chhuah a nih atanga thla 2 (hnih) chhung huam tur niin thupek zawm lo chu Section 223 of Bharatiya Nyaya Sanhita, 2023 dan hmangin hrem theih an ni ang.