Myanmar nena inkalpawhna khauh zawkin kalpui

Zokhawthar-a India leh Myanmar inkalpawhnaa mihring kaltlangna chu kumin January ni 1 atangin venhimna khauh zawkin kalpui a ni a, ramri paltlang tum ten Border Pass an neih a ngai tawh a ni.

Champhai District SP chuan kar kalta khan thuchhuah siamin Sawrkar laipuia Home Ministry thuchhuak zulzuia Mizoram Home Department in thuchhuah a siam angin India leh Myanmar ramri paltlang tumtu te chuan Border Pass an neih ngei a ngai tawh dawn a, Zokhawthar leh Hnahlan atanga ramri paltlang tur, India ram atanga lut leh chhuak turte chuan Ramri atanga KM 10 huamchhunga cheng an ni ngei tih finfiahna Certificate, Police Station Officer Incharge emaw, an chenna khaw roreltu emaw, khawtlang hruaitu sawrkar hriatpui emaw hnen atangin an nei ngei tur a ni a, heng an lehkha hmang hian Ramri a duty ten Border Pass an lo siam sak thin tawh dawn a, hemi tello chuan paltlang a theih tawh dawnlo a ni.

Thuchhuah tarlan danin Border Pass hi ni 7 ralhmain Pass an lakna hmunah thehlut lehin an chenna lamah an let leh tur a ni a, Border pass hi ni sarih (7) chhung a nung ang a, hetihlai hian KM 10 huamchhung a cheng ngei an ni tih finfiahna lehkha erawh chu kum khat chhung atan hman theih a ni thung ang.

Ramri paltlangna hmun tur hi Thawhtanni atanga Inrinni zing lam dar 6:00 atanga chawhnu dar 3:30 thleng hawn thin tur niin Naupang kum tling lo hnenah Border pass hi pek theih a ni lova, puitling in an hruai thei ang a, puitling pakhatin naupang pathum aia tam an hruai dawn a nih chuan Border pass dang siam belh tur a ni. Border pass hi Police, Medical mi leh sa leh Assam Rifles a thawktuten an buaipui thin dawn a, thupek bawhchhia emaw, zawm lote chu Dan dinglai anga hrem emaw, Border pass pek loh emaw a ni dawn a ni.

Hetihlai hian Myanmar ramchhung Khawmawi atanga Zokhawthar a lehkha zir tura langa kal thinte chu tuna Free Movement Regime (FMR) tihdanglamna avangin an dinhmun a chiang lo a. Zokhawthar khawtlang hruaitute sawi danin tun dinhmunah Primary atanga Higher Secondary thlengin Khawmawi atanga Zokhawthar-a lehkha zir tura nitin langa kal thin mi 500 bawr vel an awm a. FMR kalpui hi School chawlh lai a nih avangin heng zirlaite dinhmun tur hi a hriat theih loh tih an sawi a. Ramri-ah dan an nih chuan School an kal thei dawn lo tih an sawi a ni. FMR hian kum 18 la tling lo te hnenah Border Pass pek theih a ni dawn lo a. An nu leh paten an hruai tur a ni, tiin inkaihhruainaah a tarlang a. Zokhawthar atanga thudawnna chuan, zirlaite hi nitin an nu leh pate’n an kalpui ziah chu thil theih a ni dawn lo tih sawiin, Khawmawi atanga Zokhawthara nitin lehlanga zirlai kal thinte chungchangah hian Police lam chuan PHQ-ah ziakin an thlen tawh nia sawi a ni.