YMA in Krismas vuakvet-a hmalak dan tur an ruahman

Serchhip Sub-Hqrs. YMA chuan nimin khan Sub-Hqrs. YMA Executive Committee (SEC) thutkhawm neiin Krismas leh kumthar vuakvet-a hmalakna tur hrang hrang an sawiho.
Serchhip Sub-Hqrs. YMA Conference Hall-a SEC Meeting neih hi an President Kawlthuama chuan kai-hruaiin kan hma lawka Krismas vuakvet lo thleng turah boruak muanawm tak a awm theih nan Town chhunga YMA Branch hrang hrangte leh Direct-a awp Branch te chu mahni huamchhung theuh ah Duty Post siama Duty leh nise tiin, heng Duty Post te hi hruaitu ten tlawh nise an ti a. Sawrkar in Halpuah leh halmawi te a khap angin heng khapna hi a hlawhtlin ngei theih nan Branch tin ten an huamchhung theuh ah hmalak nise, YMA Information Mike kaltlangin a remchan angin au thin nise an ti bawk a. Krismas lo thleng tur pual hian Serchhip District-a Damdawi In leh Home hrang hrang 16-ah Nausen piang chibai bukna thilpek hlan leh nise an ti bawk.

Heng bakah hian nimin-a SEC thukhawm hian Serchhip District-a raltlan te hnena buhfai sem tur Branch YMA te kaltlanga tlawmngaia sem tura DC Office atanga ngenna an dawn chu sem theih a nih veleh Disaster Management Committee ten hma lain bawhzui nise an ti a. Tunah hian raltlan te hnena buhfai sem tur hi Serchhip rawn thlenpui ni tawhin sem tura phurhna chungchang leh thildang ah tihfel ngai ala awm avangin sem mai theih ala ni lo a ni.