Chhingchhip-a Sainik School te Annual Day Chief Minister Lalduhoma’n a hmanpui

Chhingchhip-a Sainik School ten Annual Day vawi 8-na an hman chu Zirtawpni khan Chief Minister Lalduhoma chuan hmanpuiin Sainik School chhuak mi hlawhtling leh ropui tak tak sawi tur tam tak an awm thu leh Chhingchhip-a Sainik School pawh an beisei a san thu a sawi.

Chhingchhip Sainik School ten an School-a Annual Day vawi 8-na an hman ah hian Chief Minister Lalduhoma chuan Sainik School chu India rama School tha pawla ngaih a nih thu sawiin, “Sainik School chhuak mi hlawhtling leh ropui tak tak sawi tur tam tak an awm. Chhingchhip Sainik School pawh kan beisei sang hle a. He School tana kan insenna te hi investment-ah kan ngai a ni,” tiin India rama Sainik School zinga Girls Cadet Admission nei hmasa ber an ni pawh lawmawm a tih thu a sawi a, Zirna pangngai bakah Sports lamah te, Culture & Tradition lamah te an titha thin hle tih pawh a hriat thu a sawi a, Sport-ah phei chuan National Level Award pawh an dawng nual tawh tih a sawi a. Naupangte theihna ropui tak tak a hmu chuan rilru an tih hlim thu a sawi bawk.

Chief Minister chuan Sanik School-a zirlai naupangte chu theihtawp lo chhuah zel tura chahin, “School tha taka in zir thei hi in vannei hle a, a tha thei ang berin in zirchhuak dawn nia. Mizoram leh India hian lehkhathiam, kan ram leh hnam tana mi tangkai kan mamawh a, Chhingchhip Sainik School atang hian chutiang mi chu rawn chhuak se, tiin kan suangtuah thin. Mizoram sawrkar hian kumtin he School hi grant tam tham tak pe thin a. Chutianga phur taka sawrkarin he School-a grant thin chhan chu zirlai hlawhtling tak tak kan neih theih nan a ni,” a ti bawk.

He hunah hian School Principal Lt. Col. Kartik Sood chuan report pein Chhingchhip Sainik School hi April, 2017-a din a ni a, India rama Sainik School 26-na niin tunah chuan Sainik School hi India ramah 33 an awm mek a, Ministry of Defence hnuaia Sainik School Society in a enkawl te an ni a. Chhingchhip-a Sainik School-ah hian Class 6 atang 12 zirna awmin, India rama Girls Cadet nei hmasa ber an ni.

Annual Day-ah hian naupangte hian zirna pangngai baka an zir thiam hmuhnawm tak tak Drill Demonstration, Gymnastic, Martial Art, Khukri Dance leh thil dang te an entir a. Tunah hian zirlai 388 an awm mek a, an zinga 52 hi hmeichhia an ni. A zir man hi naupang pakhat tan kum khatah cheng nuai 2 vel a ngai a. School-ah hian Shopping Complex thlengin a awm a ni.

Sainik School Chhingchhip in Annual Day an hman hi Aizawl leh Serchhip Bawrhsap te bakah Assam Rifles hotu pawimaw tak tak ten an hmanpui bawk a ni.