MPL-a zirlaite inthiarchhuak

Mizoram Polytechnic Lunglei-a Institution building 7 te chu Sawrkar in luahman a pek loh avanga Court in Vawiin-a kalh tura Lunglei Police a hriattir angin nimin khan zirlaite chu an Institution Multipurpose Hall-ah an in thiarlut a, zirlaite hi tunkar Nilaini-ah Exam tur an nih avangin nimin khan Mizoram Polytechnic Principal leh MSU Lunglei hruaitu ten Court-ah zahngaihna an dilpui a, amaherawhchu Court hi a thu ah a tawlhkir dawn lo nia thudawn a ni. Court in Mizoram Polytechnic Lunglei-a building a kalhsak tur te hi Main Building, Science Block, Seminar Hall leh Library, Fitting & Pumbling Workshop, Workshop, Farm House leh Store Room te an ni.

Mizoram sawrkar in Lunglei-a Mizoram Polytechnic Campus chhunga ram neitute hnena ram luah man a bat sak chungchang ah hian ram neitute lungawilo chu Lunglei District Court-ah an zualko a, he thubuai ngaihtuahtu Senior Civil Judge chuan kum 2022 khan Mizoram sawrkar chu ram neitute hnenah ram luah man Rs. 95,05,033/- pe turin thutlukna a lo siam tawh a, Sawrkar hian Court thutlukna hi Court sang zawkah khing lovin sum pawh a pe chuang lo a, hei vang hian nikum January 24 khan ram neitute hi Court-ah zualko lehin hei hi Court chuan a ngaihtuah hnuah ram luah man hi an pek hma chu Building 7 hi kalh sak turin a ti ta a ni.