SWD Minister Lalrinpuii’n Karnataka Minister a kawm

Social Welfare Minister Lalrinpuii chuan niminpiah khan Karnataka Deputy Chief Minister DK. Shiva Kumar chu Bengaluru-ah hmuin Mizoram House sakna tur atana thawhho theih dan tur kawng hrang hrang a sawipui a. Minister Lalrinpuii hian Karnataka Deputy Chief Minister hi Bengaluru-a Mizoram House sakna tur atana Mizoram in ram a neih dante a hrilh a, DK. Shivakumar chuan Chief Minister pawh lo sawipui a, theihtawpa thawhhopui an inhuam thu a lo hrilh a ni.

Minister Lalrinpuii hi niminpiah vek khan Karnataka Tribal Welfare Department Secretary Randeep D leh Yogesh T, Director, Tribal Affairs te'n hmu bawkin, Tribal Cultural Exchange Programme neih theih dan tur chung-changte an sawiho a. Nimin khan Karnataka Tribal Affairs Director Yogesh T leh a team-te bakah Bangalore Mizo Association hruaitute'n Mizoram House sakna tur ram chu a hmunah an enho nghal bawk a ni.