Olympic-a tel nan Coach ten mawh an phur tih sawi

Sports & Youth Services Department changtu Minister Lalnghinglova Hmar chuan Olympic 2036 a Mizo infiammi an tel ve theih na'n Coach te'n mawhphurhna sang tak an nei tih a sawi.

Sports & Youth Services Directorate-a Coach Refresher Course kalpui mek nimin-a a hmanpuina ah Sports Minister Lalnghinglova Hmar chuan Coach te chu tih tak takna nen thawk a, Mizo infiammi te hmasawnna tura theihtawp chhuah turin a chah a. Coach te chu mahni hna dah pawimawh hmasa ber tur leh hun vawn dik leh inthunun chungchang ah an zirlaite entawntlaka nung turin a fuih a, “Coach berin training a kal tlai chuan hmasawn a harsa,” tiin training pek dawnah a hun hmaa thleng thin turin a chah bawk.

Sports & Youth Services Department chuan October ni 15 atangin khan Coach te tan intuaitharna (refresher) Course a buatsaih a. October ni 15-16 chhung khan Seminar on Sports Medicine and First Aid neih niin nimin leh niminpiah ah Seminar on Sports Psychology and Method of Training neih a ni thung a. He hunah hian Department Coach te bakah Khelo India State Centre of Excellence (KISCE), District Khelo India Centre (KIC) Coach te leh Scouts & Guides, Adventure Wing Staff mi 55 chuang an tel a ni.