Ramri chungchang ah State pahnih inbiakna neih a ni

Mizoram leh Assam ramri chungchanga State pahnih hruaitute inbiakna chu nimin khan Aizawl State Guest House-ah neih a ni.

He inbiakna hi 'Goodwill Mission' tia vuahin nimin tlai dar 4:00 khan neih a ni a, inbiakna neih zawh hnua thuchhuah intawm siamin February ni 9, 2024 a Assam leh Mizoram Chief Minister te'n State pahnih inkarah inhriatthiamna leh duhsakna nena ramri buaina chinfel a nih theih nan inpekna nghet tak nena hmalak thin ni se tia thu an dah chu an nemnghet nawn leh tih an sawi a. Ramri-ah remna leh muanna vawn chhunzawm zel nise, thil duhawm lo a thlen loh nan hmalak nise an ti a. Ramri hnaih District thuneitu ve ve te'n a khat tawkin Joint Cultural and Sports Festival-te buatsaih thin se, hemi tur hian January 31, 2025 ralhma ngeia hmalak nise an tih bakah Minister kaihhruai thutkhawmna hi March ni 31, 2025 a neih leh tur a tih a ni.

State pahnihte hian ram dang atanga kuhva ro tawlh chungchangah tumah ngaihnathiamna nei lova khauh taka hmalak chhunzawm remti in Assam leh Mizoram inrina bialtu DC leh SP ten Inter-State Border (ramri hrul) ah remna leh muanna a awm reng theih nan thla tin Virtual Meeting neih rem tih a ni a. Ramri buaina chinfel kawng ah ramri hrul a chengte an pawimawh zia hria in an ni nena tha taka thawhho a tul tih an pawm a, ramri kaihhnawih buaina leh harsatna a awm reng rengin ramri hrul a cheng mipuite leh a kaihhnawih zawng zawng ten anmahni thu a hma la nghal mai lovin thuneitute hnen ah thlen thin se an ti bawk.

He inbiakna nei tur hian Assam sawrkar aiawhte chuan nimin khan Aizawl rawn thlengin, Assam Border Protection & Development changtu Minister, Atul Bora chuan a rawn ho a, Mizoram lam hi Home Minister K. Sapdanga'n a kaihruai a ni.