LENKAWL in kum 43 a tling ta

Kan Chanchinbu LENKAWL chuan Vawiin August 14, 2024 hian kum 43 tlingin kum 44-na a lo hmang ve tan dawn ta a. Kan Chanchinbu chhuah tirh atanga harsatna tam tak kara tun hun min hruai thlengtu Pathian hnenah lawmthu kan sawi a, kum 1981-a he Chanchinbu tihchhuah tan a nih atanga Vawiin thlenga kan Chanchinbu enkawlna hna lo thawk tawhtu zawng zawngte, tlawm-ngaia min lo sem sak tawh thin te leh min laksaktu zawng zawngte chungah lawmthu kan sawi a. Chutiang bawkin thuchhuah tur tha tak tak min pe thintute leh he Chanchinbu a kal zel theihna tura min puibawm thintute leh min tanpuitu te zawng zawng chungah Vawiin hian a tharin lawmthu kan sawi a ni.

Kan sawi fo tawh thin angin LENKAWL hi Serchhip khawtlang hmasawnna tan tangkaina a neih ve theih beiseina avanga tihchhuah niin Serchhip tana ding, mipuite a duh apiangin an hman tangkai theih tura beisei a ni a. Mipuite pawhin min hlut sakin tunah chuan kum 43 lai a lo tling ta a. A hma ang bawkin mipuite tana tangkai taka hman theih turin kan inpeih reng a, kan khawtlang, kan ram leh Hnam leh mimal tin ten hmasawnna atana in hman theih turin zau takin kawng kan hawng reng bawk a ni.

Khawvel hmasawn zelah thalai ten kan zirna kawngah nasa taka hma kan sawn mek laiin ziak leh chhiar lam erawh kan uar ta lo hle niin a lang a, a bik takin Chanchinbu chhiar leh ngaihthlak lamah phei chuan kum upa te kan phak ta lo hle niin a lang a, thu ziak mi pawh kan tlem tial tial niin a lang. Kan thalaite hian chhawr tlak thiamna bakah kan hriatna tizau turin ziak leh chhiar hi kan uar deuh deuh hi a tul hle a ni.