India Independence Day vawi 78-na lawm a ni dawn

Vawiin August 15, 2024 hi India ram zalenna ni champhaphak, India Independence Day a ni a, India ramchhung hmun hrang hrangah urhsun takin he ni hi hman a ni ang.
Serchhip-ah chuan India Independence Day hi Vawiin chawhma dar 10:00 hian Serchhip Sports Complex-ah hman tur niin LAD Minister C. Lalsawivunga chuan khuallian niin a hmanpui dawn a, khuallian hian India Hnan Puanzar pawtparhin Parade Chibai buk a chhanglet anga, mipuite hnenah thuchah sawiin, March past en tur a awm dawn bakah Mizo Hnam Lam en tur a awm dawn bawk a ni.

India ram hian August ni 15, 1947 khan Kumpinu Sawrkar lak atanga zalenna hmuin Independent, mahni a inrelbawl sawrkar a lo ni ta a; hemi kum atang hian kumtin India Sawrkar chuan Independence Day hi August ni 15 hian a lawm ziah thin a ni a. Sawrkar Pisa chawlh ah puan a nih angin sawrkar Office leh zirna In te khar tur a ni ang.

Serchhip District Bawrhsap Paul L. Khuma chuan Serchhip-a India Independence Day lawmna neih turah hian mipui zawng zawngte tel theuh tura sawmin, “Independence kan hmuh theihna tura sulsute, nunna leh thisen chhuaka he zalenna hi kan hmaa mihuaisen ten an lo sual chhuah a ni tih hre thar leh chungin Independence Day vawi 78-na kan District-in kan hman turah hian Serchhip District mipui zawng zawng te lo tel vek turin ka sawm a che u,” a ti bawk.