Mizoram-a raltlan rawn lut 42,576 an awm

Tun dinhmunah thenawm ram Myanmar leh Bangladesh atanga sahimna zawnga raltlan lo lut bakah Manipur-a chi leh chi intihbuai avanga Mizoram-a himna zawnga lo lut mi 42,576 an awm mek.

He thu hi Assembly Session neih meka ziaka chhan chi zawhna a chhanna-ah Home Minister K. Sapdanga chuan sawiin, Manipur a chi leh chi inkara buaina avanga In leh lo chan leh awm ngam lova tlanchhia a Mizorama awm mek hi February ni 9 thleng khan mi 9,248 an ni a. Myanmar-a sipai-in February ni 1, 2021-a sawrkarna an hnehchhuh hnua raltlan lo lut chu kumin February ni 3 thleng khan mi 32,161 an ni bawk. Heng bakah hian kum 2022 November thla chawhnu lama Bangladesh sipai leh Kuki-Chin National Army te an inkah fo avanga Bangladesh Chittagong Hill Tracts atanga sahimna zawnga Mizorama raltlan lo lut chu January ni 25 thleng khan mi 1,167 an ni a. Myanmar leh Manipur atanga rawn lutte hi Mizoram District hrang hrangah awmin, Bangladesh atanga lo lutte erawh hi chu Lawngtlai District-ah an awm vek thung a ni.

Home Minister chuan Mizoram-a raltlante mit naute thla leh an kutzungpui thla te laksak turin engmah kalpui a la nih loh thu pawh a sawi bawk a. Chutih laiin District tina thuneitute chuan heng raltlan te hi an chanchin kimchang lakhawmin Home Department-ah an thehlut thin niin a sawi a, sawrkar laipuiin Myanmar raltlante tanpuina atan cheng nuai 300 a rawn pek tawh thu a sawi bawk.

Hetihlai hian nikum May ni 3-a Manipur a chi leh chi inkara tharum thawhna thleng avanga Mizoram-a sahimna zawngtute tan thla 10 ralhnu ah pawh sawrkar laipui chuan pawisa cheng khat mah a la rawn pe lo thung a ni.