Kawng siam hna tha lo ah ACB-ah FIR thehluh a ni

PMGSY hnuaia Luangmual to Vaisam inkar kawng laih hna thawktu Contractor leh Lunglei Road Division-II Lunglei, Mizorama a hotu lu ber te lakah Vanramchhuangi (Ruatfela Nu) chuan nimin khan Anti Corruption Bureau (ACB)-ah FIR a thehlut.

Vanramchhuangi chuan Luangmual to Vaisam PMGSY kawng laih mekah kawngsir tui luankawr (side drain) chhia Video Clip viral a hmuh thu sawiin, “A hmain he kawng laih mek chhe lutuk chungchang hi kan lo sawi fo tawh a, rilru a la nghal zar mai,” tiin Anti Corruption Bureau (ACB)-ah FIR thehlut tura thutlukna a siam tak thu a sawi a ni.

Vanramchhuangi chuan he kawng laih hna thawktu VRS Construction, Zonuam, Aizawl leh a viltu, Mizoram PWD Lunglei Road Division-a a lu ber, Engineer-te'n mipui pawisa (public fund) ngeia mipui tam takin an chhawr tangkai tur, inkalpawhna kawng laih hna leh vil hna an thawhna kawngah pawisa neitu mipui zahphahna chhete mah nei lovin duhdah takin kawng an siam niin a sawi a, “He kawng laih hna thawktu leh a viltu hian inang rengin ram mipui pawi an sawi,” tiin heng mite hi an tihsual anga hrem an nih ngei theih nan Dan anga hma la turin ACB chu a ngen a ni.