Mizoram venghim turin YMA Member te an pawimawh hle - Central YMA President

Central YMA President Lalhmachhuana chuan Mizoram venghim turin YMA member te an pawimawh hle tih a sawi.

Zawlbuk Group YMA Sports Meet kharna hun nimin-a Thingsulthliah Playground-a neih a hmanpuina ah Central YMA President Lalhmachhuana chuan Mizoram hian venghimtu a mamawh thu leh Vengtu a neih loh chuan a nawmna te, a ralmuanna te hi a tluchhe mai ang tih a hlauhawm tih sawiin, Mizoram venghim tur hian YMA member te an pawimawh hle tih a sawi a, “YMA member tin hian tih tur an nei a, theihtawp an chhuah tlan a ngai a ni,” tiin Ram leh hnam dinchhuah nan chuan nek ngai leh ke pen chhuah ngai a lo awm thin a, theihtawp an chhuah tlan a ngai tih a sawi. Mizoram-ah YMA hmelthar din an tum dawn tih pawh Central YMA President chuan sawiin, YMA hmelthar Mizoten an hmuh theih nan tan an lak tlan a ngai dawn tih a sawi a. YMA awm tawhna hmun apiangah chuan dik lo ni a an hriat chu an do ngam a ngai tawh, ram leh khawtlang a lo him theih nana tangrual zel turin YMA memberte a sawm bawk.

Election Commission of India (ECI) in Pathianni a vote chhiar hun an tihtluk chungchang pawh Central YMA President chuan sawiin, Mizote tan chuan he ni hi serh satliah a ni lova, Pathian biakna ni, ringtute tan chuan ni pawimawh ber mai a nih thu a sawi a. Pathian biakna ni pawimawh tak mai a vote chhiar chu a ni sawn turin an ngen tih sawiin, a tul anga hma an lak zel dawn thu leh NGOCC Meeting te pawh neih a ni dawn tih a sawi a, he Meeting thuchhuak hi lo ngaichang turin YMA memberte a ngen bawk. Central YMA President chuan tunlaiah Mizote Sakhua leh Mizo hnam tana pawimawh NGO in a buaipui laiin hnam tan a pawimawh tilo leh hnam tana theihtawp chhuahtute nuihzat pawl an awm chu a zahthlak tih a sawi a. A hunah Mizote tanrual zel a ngai tih a sawi bawk.

Zawlbuk Group YMA huamchhungah hian Branch YMA 23 a awm a, Branch YMA 23 te hian infiamna chi hrang hrang hmangin inelna an nei a ni.